Xorazmda issiqxona qurish uchun bankdan 2 mln dollar kredit ajratib berish evaziga 80 ming dollar olgan shaxslar ushlandi

Xorazm viloyatida yer maydoni va kredit ajratishni va’da qilgan shaxslar ushlandi, deb xabar beradi Bosh prokuratura huzuridagi departament.

Ma’lum qilinishicha, departamentning Bog‘ot tuman bo‘limi tomonidan DXXning Xorazm viloyati boshqarmasi xodimlari bilan hamkorlikda tezkor tadbir o‘tkazilgan. Tadbir davomida R.B. va Z.A. ismli shaxslar fuqaro O.ning ishonchiga kirib, Z.A. rahbarligidagi “Z.-J.” MCHJga ajratilgan 1,5 gektar yer maydonini uning nomiga o‘tkazib berishni va’da qilgani aniqlangan. Shuningdek, ular bankdagi tanishlari orqali issiqxona qurish uchun 2 million dollari miqdorida kredit olishda amaliy yordam berishlarini aytgan. Buning evaziga ular fuqarodan 90 ming dollari talab qilib, shundan 80 dollarini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Buxoro va To‘rtko‘lda yer sotmoqchi bo‘lgan kadastr sobiq mutaxassisi hamda fuqaro ushlangani, O‘zbekistonning uchta hududida noqonuniy yer olib berish uchun jami 10 ming dollar va 120 mln so‘m olgan shaxslar qo‘lga olingani to‘g‘risida xabar berilgandi.