Andijonda uylanmoqchi bo‘lgan qizini olib qochgan yigit va uning do‘stlari 5,4 mln so‘mdan jarimaga tortildi. Bu haqda “Daryo”ga viloyat sudi axborot xizmati xabar berdi.
Jinoyat ishlari bo‘yicha Qo‘rg‘ontepa tuman sudi sudyasi Ozodbek Ne’matillayevning aytishicha, Jalaquduq tumanida yashovchi 28 yoshli yigit B.J. qarindoshining qizi S.A.ga sovchi qo‘ygan. Qizning ota-onasi sovchilarga rad javobini bergach, yigit ikki nafar do‘sti — D.A. hamda A.K.lar bilan birga qizni otasiga tegishli Damas’da o‘g‘irlab qochgan.“S.A.ning oilasi bilan oilaviy qarindoshligimiz bor. Ularning uyiga mehmonga borganimda qizni yoqtirib qolganman. Ammo qizga bu haqda aytmaganman. Shunday bo‘lsa-da, u bilan turmush qurish maqsadim bo‘lgani uchun uning uyiga sovchi yubordim. Lekin qizning ota-onasi bunga rozi bo‘lmagach, qolaversa S.A.ning Rossiyaga ketishini eshitib uni o‘g‘irlab ketishga qaror qildim. Rejani amalga oshirish uchun o‘rtoqlarim D.A. va A.K.lardan foydalandim. Bo‘lib o‘tgan holat uchun undan va oila a’zolaridan uzr so‘rayman”, — deydi sudda so‘z olgan B.J.
Sud hukmi bilan sudlanuvchilar — J.B., A.D. hamda A.K.lar Jinoyat kodeksining 136-moddasiga (ayolni erga tegishga majbur qilish yoki uning erga tegishiga to‘sqinlik qilish) asosan aybli deb topilib, unlarga nisbatan bazaviy hisoblash miqdorining 20 baravari, ya’ni 5,4 million so‘mdan jarima jazosi tayinlangan.
Izoh (0)