Россия Мудофаа вазирлиги Тоғли Қорабоғда сўнгги кунларда кескинлашаётган вазият Россия тинчликпарвар кучлари томонидан «барқарорлаштирилгани»ни маълум қилди.
«Музокаралар натижаларига кўра, Озарбайжон томони Фурух аҳоли пункти ҳудудидан ўз бўлинмаларини олиб чиқишни амалга оширди», — дейилади Россия Мудофаа вазирлиги хабарда.
Озарбайжон Мудофаа вазирлиги россиялик ҳарбийларнинг даъволари ҳақиқатга тўғри келмаслигини маълум қилди. Боку Озарбайжон ҳарбийлари қишлоқдаги ўз ўрнида қолаётганини ва «оператив вазиятни тўлиқ назорат қилаётганини» таъкидламоқда.
Тоғли Қорабоғдаги янги кескинлашув 24 март куни бошланди. У ерда тинчликпарвар кучлар сифатида жойлаштирилган россиялик ҳарбийлар версиясига кўра, Озарбайжон ўз кучларини Россиянинг назоратидаги зонага олиб кирган ва Тоғли Қорабоғ республикаси армияси бўлинмаларига дронлар билан ҳужум қилган. Озарбайжон Тоғли Қорабоғда ўт очишни тўхтатиш ҳақидаги келишув шартларини бузганини рад этди ҳамда у ер ўз ҳудуди эканини билдириб, қўшинларини олиб чиқишдан бош тортди. Озарбайжон Мудофаа вазирлиги Россиядан «Тоғли Қорабоғ» иборасини ишлатмасликни ва Озарбайжон ҳудудлари номини тўғри кўрсатишни сўради.
2020 йил сентябрь ойи охирида Тоғли Қорабоғда кўп йиллар давомида биринчи марта кенг кўламли ҳарбий ҳаракатлар бошланганди. Улар бир ярим ой давом этди; 10 ноябрь куни томонлар Россия воситачилигида ўт очишни тўхтатиш тўғрисида келишувга эришди. Жанглар натижасида Арманистон Тоғли Қорабоғ республикасининг қарийб ярмини Озарбайжонга қайтарди. Россия Тоғли Қорабоғга тинчликпарвар контингентини юборди.
Мавзуга доир: Тоғли Қорабоғ ҳукумати ҳарбий ҳолат эълон қилди
Изоҳ (0)