Ozarbayjonning birinchi prezidenti Ayaz Mutalibov vafot etdi

Ozarbayjonning birinchi prezidenti Ayaz Mutalibov 83 yoshida vafot etdi, deb xabar bermoqda Azerbaycan24.

Qayd etilishicha, Mutalibov uzoq davom etgan kasallik tufayli olamdan o‘tgan.

Mutalibov 1938-yilda Bokuda tavallud topgan. 1963-yilda Sovet Ittifoqi Kommunistik partiyasiga a’zo bo‘lib, sanoat korxonalariga rahbarlik qilgan. 1979—1982-yillarda Ozarbayjon SSR mahalliy sanoat vaziri, undan keyin respublika Davlat plan qo‘mitasi raisi va Ozarbayjon SSR Vazirlar Kengashi raisining o‘rinbosari, keyin esa Vazirlar Kengashi raisi bo‘lgan. 1990-yil may oyida Ozarbayjon SSR prezidenti etib saylandi. U Sovet Ittifoqi Kommunistik partiyasi markaziy qo‘mitasi, shuningdek, partiya Siyosiy byurosi a’zosi edi.

1991-yilda Ozarbayjon mustaqilligi e’lon qilingandan so‘ng mamlakatda bo‘lib o‘tgan ilk prezidentlik saylovlarida u yagona nomzod bo‘ldi va 98,5 foiz ovoz to‘pladi.

Uning prezidentlik davrida tan olinmagan Tog‘li Qorabog‘ respublikasi atrofida vaziyat keskinlashdi. Mojaro arman va ozarbayjon aholisi o‘rtasidagi qarama-qarshilikka aylanib ketdi. Ozarbayjon armiyasining hududiy yo‘qotishlari va muvaffaqiyatsizliklari fonida Ayaz Mutalibov 1992-yil mart oyida iste’foga chiqdi.

Biroq o‘shanda prezident vazifasini bajaruvchi Yoqub Mamedov vaziyatni o‘nglay olmadi va 1992-yil may oyida Oliy Kengash deputatlari Mutalibovni lavozimiga qayta tiklash uchun ovoz berdi. Ammo muxolifat bosimi ostida u tez orada prezidentlikdan voz kechdi va mamlakatni tark etdi.

Shundan keyin sobiq prezident Moskvada yashagan. 2000-yillar boshida u siyosiy faoliyatga qaytdi, Fuqarolik birligi partiyasini boshqardi, keyin Ozarbayjon Sotsial-demokratik partiyasi hamraisi bo‘ldi. Mutalibov 2011-yilga kelibgina Ozarbayjonga qaytib kelgandi.