“Bu tadqiqotchilar va talabalarga emas, Putin rejimiga qarshi chora.” Buyuk Britaniya Rossiya universitetlari bilan ilmiy hamkorlikni to‘xtatdi

Rossiyaning Ukrainaga bostirib kirishi fonida Britaniya hukumati Rossiya universitetlari va kompaniyalari bilan ilmiy hamkorlik sohasida cheklovlar joriy etilishini e’lon qildi. Bu haqda Britaniya Vazirlar Mahkamasi saytida xabar berilgan.

Buyuk Britaniya “Rossiya o‘lchoviga ega” loyihalarni amalga oshirish uchun davlat grantlarini to‘lashni to‘xtatdi. Mamlakat o‘zining tadqiqot va innovatsion tashkilotlari orqali Rossiya bilan “Putin rejimiga to‘g‘ridan to‘g‘ri foyda keltiradigan” har qanday yangi qo‘shma loyihalarni moliyalashdan bosh tortdi. Buyuk Britaniya fan va innovatsiyalar, shuningdek, qo‘shma ilmiy loyihalar bo‘yicha ikki davlat o‘rtasidagi hukumatlararo muloqotni ham to‘xtatdi.

“Bu choralar Rossiya davlatiga, shuningdek, Kreml bilan yaqin aloqada bo‘lgan odamlar va tashkilotlarga qarshi qaratilgan”, — dedi Buyuk Britaniya fan vaziri Jorj Friman. “Bu harakatlar Kremlning xatti-harakatlariga tez-tez e’tiroz bildirib turadigan rossiyalik tadqiqotchilar va talabalarga emas, balki Putin rejimiga qarshi qaratilgan”.

Shu bilan birga, Frimanning aytishicha, Britaniya hukumati mamlakatda ilmiy faoliyatini davom ettirmoqchi bo‘lgan ukrainalik olimlarga yordam berish uchun 3 million funt sterling (3,6 million yevro) ajratishga qaror qilgan.