Buyuk Britaniyaning Daily Mail nashri Premyer Liga klublari muxlislari orasida so‘rovnoma o‘tkazdi. Unda ovoz beruvchilar o‘zi muxlislik qiladigan jamoaning egalari ishini baholagan.
100 ming muxlis ishtirok etgan so‘rovnomada “Manchester Yunayted” egalari eng yomon natija qayd etgan. Qatnashuvchilarning bor-yo‘g‘i 4 foizi Gleyzerlar oilasining boshqaruvini yoqlagan.
Antireyting top-3 ligidan Gleyzerlardan tashqari “Nyukasl”ning saudiyalik egalari (10,9%) va “Everton”ning egasi Farad Moshiri (14,2%) o‘rin olgan.
Eng yaxshi ko‘rsatkich “Brentford” xo‘jayini Metyu Benhemda qayd etilgan. Muxlislarning 98,8 foizi uning ishini yoqlagan.
“Chelsi”ni sotib yuborish arafasida turgan Roman Abramovichni 92,5% ovoz beruvchi yoqlab chiqqan. “Manchester Siti” egasi shayx Mansurni 90,5% muxlis qo‘llab-quvvatlamoqda, “Liverpul”ga egalik qiladigan FSG kompaniyasi 88,6% ovoz olgan. “Arsenal” xo‘jayini Sten Kronkeni londonliklarning 30,3% muxlisi yoqlagan.
Eslatib o‘tamiz, 2021-yilning may oyida “Manchester Yunayted” muxlislar APL doirasida “Liverpul”ga qarshi o‘yin oldidan Gleyzerlarga qarshi norozilik aksiyasi o‘tkazgan va natijada tartibsizliklar sabab “Old Trafford”dagi uchrashuv qoldirilgandi.
Izoh (0)