Toshkent shahrida “Navro‘z” IV hamda O‘zbekistonning xalqaro nufuzini mustahkamlash va Shanxay hamkorlik tashkiloti doirasidagi madaniy-gumanitar aloqalarni qo‘llab-quvvatlash maqsadida ilk bor Toshkent xalqaro yarim marafoni bo‘lib o‘tdi. SHHT Toshkent xalqaro yarimmarafoni dasturiga 3 km va 21 km, shuningdek, “Navro‘z” IV marafoni klassik marafon (42 km 195 m) va 10 km masofada o‘tkazildi.
27-mart, yakshanba kuni bo‘lib o‘tgan marafonning start va finish chizig‘i Afrosiyob hamda Beshyog‘och ko‘chalari chorrahasida (“Humo Arena” muz saroyi), SHHT Toshkent xalqaro yarim marafonining yo‘nalishi poytaxtning markaziy ko‘chalari, ya’ni, Nukus, Abdulla Qodiriy va Abay bo‘ylab tashkil etildi.
SHHT Toshkent xalqaro yarimmarafoni g‘oliblarining umumiy mukofot jamg‘armasi 138 million so‘mni (yarim marafon uchun 126 million so‘m, 3 km masofaga 12 million so‘m) tashkil etdi.
“Daryo” muxbirlari mazkur marafondan reportaj tayyorladi.
Boks bo‘yicha Tokio Olimpiadasi chempioni Bahodir Jalolov esa mazkur marafon o‘ziga yoqqanini aytdi.
“Biz ham unda qatnashdik va medal ham berishdi. 3 kilometr masofada yugurdik. Bu kabi marafonlar qanchalik ko‘p bo‘lsa, shuncha yaxshi bo‘ladi. Bu sport insonlarni bir-biriga do‘stlashtiradi. Bugun barcha g‘olib bo‘laman deb harakat qildi. Men oxirrog‘ida keldim, musobaqalardan so‘ng dam olishda edim, shuning uchun biroz formadan chiqibman”, — deydi bokschi.
Milliy olimpiya qo‘mitasi bosh kotibi Oybek Qosimov yugurish barcha uchun qulay bo‘lgan sport turi ekanini bildirdi.
“Albatta, yugurish sporti eng ommaviy, barcha uchun ma’qul bo‘ladigan sport turi. Bugungi marafon barchaga bayram kayfiyatini ulashyapti. Havo ham juda ajoyib, kechagi yomg‘irdan so‘ng bugungi havoda yugurish juda maroqli. MOQ jamoasi ham bugungi marafonda ishtirok etdi”, — deydi u.
O‘zbekiston futbol assotsiatsiyasi birinchi vitse-prezidenti Ravshan Ermatov so‘nggi kunlarda kuzatilgan yog‘ingarchilikni eslab, “bugun quyoshning chiqishi juda yaxshi bo‘lgani”ni aytdi.
“Xalqimiz bilan birga marafonda ishtirok etdik. Bu ham sog‘lm turmush tarzining targ‘iboti. E’tibor bersangiz, 1,5—2 yil avval shunday marafonlarni tashkil qilganimizda odamlarni o‘zimiz kerak bo‘lsa uyiga borib olib chiqardik. Hozir 4-5 ming odamning o‘zi ertalabdan kelib, marafonda yugurish istagini bildiryapti. Bu sport xalqimizning kundalik turmush tarziga aylanib borayotganidan dalolat beradi. O‘ylaymizki, mana shunday tadbirlar doimiy tarzda bo‘ladi. Sport bilan shug‘ullanish ishda ham o‘zining ijobiy ta’sirini ko‘rsatadi.
Shanxay hamkorlik tashkiloti doirasida o‘tayotgan marafonda ko‘pgina millatlarni ko‘rdik. O‘zbekiston ko‘p millatli davlat va albatta, yurtimiz qanchalik darajada do‘stlikni, hamkorlikni targ‘ib qiladigan mamlakat ekanligini ko‘rsatyapmiz”, — deydi Ermatov.
3 km masofaga yugurish
Erkaklar:- Hasan Mirsoatov
- Viktor Tsurenko
- Diyorbek Ahmedov
3 km masofaga yugurish
Ayollar:- Shohsanam Xurramova
- Oyzira Jo‘rakova
- Darya Antropova
3 kilometr masofada qizlar o‘rtasida 1-o‘rinni egallagan Shohsanam Xurramova sportning yengi atletika turi bilan 4 yil davomida shug‘ullanib kelishini aytdi.
“O‘tgan vaqt mobaynida ko‘plab yutuqlarga erishdim. Xalqaro musobaqalar g‘olibasi, O‘rta Osiyo chempioni, O‘zbekiston terma jamoasi a’zosi hisoblanaman. Bugungi marafon juda ham ajoyib bo‘ldi. Ob-havo ham ayni yugurish uchun qulay bo‘ldi. Bu kabi marafonlarda uchinchi bor ishtirok etdim. Doim yuqori o‘rinlarni egallaganman”, — deydi u.
10 km masofaga yugurish
Erkaklar:- Bekzod Boymatov (Surxondaryo) – 35:03
- Otabek Fayzullayev (Surxondaryo) – 35:47
- Azizbek Nasimov (Samarqand) – 36:26
- Dilnoza Usmonova (Andijon) – 43:29
- Go‘zal Muhammadvaliyeva (Namangan) – 44:22
- Farida To‘lqinbekova (Andijon) – 44:53
Yarim marafon
Erkaklar:- Nursultan Keneshbekov (Qirg‘iziston) – 1:04,28
- Shohrux Davlatov (O‘zbekiston, Surxondaryo) – 1:04,40
- Otabek Toshquvvatov (O‘zbekiston, Samarqand) – 1:07,58
- Aziza Mirzaakbarova (O‘zbekiston, Andijon) – 1:15,20
- Mariya Korobiskaya (Qirg‘iziston) – 1:16,47
- Sitora Qurbonova (O‘zbekiston, Farg‘ona) – 1:24,43
Marafon (42 km 195 m)
Erkaklar:- Ilya Tyapkin (Qirg‘iziston) – 2:21,42
- Zakirillo Mamatqulov (O‘zbekiston, Farg‘ona) – 2:22,05
- Vladislav Mamedov (O‘zbekiston, Toshkent vil.) – 2:23,18
- Gulshanoy Sattorova (Qirg‘iziston) – 2:34,50
- Yekaterina Tunguskova (O‘zbekiston) – 2:39,28
- Tamilla Kuchkarova (O‘zbekiston) – 3:11,23
Izoh (0)