“Xalq artistiga — 135 ming so‘m”. Rejissor Hilol Nasimov o‘zbek aktyorlarining gonorari haqida gapirishga uyalishini aytdi (video)

Rejissor va aktyor Hilol Nasimov “Daryo” internet-nashriga intervyu berdi. U intervyu davomida o‘zbek aktyorlariga to‘lanadigan gonorar haminqadar ekanligi, u haqida gapirishga ham uyalishini ta’kidlab o‘tdi.

— O‘zbek aktyorlarining gonorari haminqadar. Ochig‘i, bu haqda gapirishga ham uyalaman. Turk kinoijodkorlari bilan hamkorlikda olingan “Jaloliddin Manguberdi” serialiga qancha pul sarflanganini eshitdim. To‘g‘ri, boshqa yurtda film suratga olishning katta sarf-xarajatlari bor. Sarkardalarning bir gapi bor: “O‘z armiyangni boqmasang, boshqalarni boqishga majbur bo‘lasan”, deyishadi. Bu filmda ham shunga o‘xshash holat bo‘ldi. Osmon ostidagi tayyor dekoratsiyalarimiz turib, o‘zga yurtda maket qurildi.

Bizda ham iste’dodli aktyorlar ko‘p, mayli, ularga turk aktyorlariga to‘langanidek gonorar berilmasa ham, hozirgi olayotgan pulidan 5-10 barobar ko‘proq to‘lansa, jonini berib ishlashga tayyor.

Xayriyatki, gonorarni ixtiyoriy tartibda belgilash bo‘yicha hujjat chiqdi, ammo hali amalga tatbiq etilgani yo‘q. Hozir ham amaldagi hujjatlar bo‘yicha bosh rol ijrochisining kunlik ishtirokiga 200 000 (ikki yuz ming) so‘m to‘lanadi. Bu pulni olgan aktyor qanday qilib rolga jonini berib o‘ynashi mumkin?

O‘tgan yili tekshiruv kelib, kinosmetada sarflangan pullarni tekshirdi. “Aka, manavi aktyorga 135 000 so‘m berishingiz kerak, nega ko‘p berdingiz?” deya e’tiroz bildirdi. Bu pulni O‘zbekiston xalq artisti Xayrulla Sa’diyevga qaysi yuz bilan to‘layman, dedim. U aktyor-ku, pulga talashib tortishmaydi, ammo boshqalarga shu pulni bersangiz, ranjishi aniq. “Mana buncha pulni bersang ber, bo‘lmasa bu puling tuproqqa qorilib, o‘ynashimga arzimaydi”, deyishadi.

“Jaloliddin Manguberdi” seriali yurtimizda suratga olinganida, pul o‘zimizda qolardi. O‘zbek aktyorlari esa jonini berib suratga tushardi.

Ha, yana bir gap, gonorar tizimi haqida juda ko‘p gapirganman. Bu sohani isloh qilish kerak. Chunki sohamizda aktyorga gonorar berishni istamaydigan, filmini “konfet” va “shokolad”lar bilan to‘ldiradiganlar ham juda ko‘p. Hatto mashhur rejissorlarning shunday qilmishi uchun kishandan ham olib qolgan vaziyatlarim bo‘lgan.

Hilol Nasimov, rejissor