Режиссёр ва актёр Ҳилол Насимов «Дарё» интернет-нашрига интервью берди. У интервью давомида ўзбек актёрларига тўланадиган гонорар ҳаминқадар эканлиги, у ҳақида гапиришга ҳам уялишини таъкидлаб ўтди.
— Ўзбек актёрларининг гонорари ҳаминқадар. Очиғи, бу ҳақда гапиришга ҳам уяламан. Турк киноижодкорлари билан ҳамкорликда олинган «Жалолиддин Мангуберди» сериалига қанча пул сарфланганини эшитдим. Тўғри, бошқа юртда фильм суратга олишнинг катта сарф-харажатлари бор. Саркардаларнинг бир гапи бор: «Ўз армиянгни боқмасанг, бошқаларни боқишга мажбур бўласан», дейишади. Бу фильмда ҳам шунга ўхшаш ҳолат бўлди. Осмон остидаги тайёр декорацияларимиз туриб, ўзга юртда макет қурилди.
Бизда ҳам истеъдодли актёрлар кўп, майли, уларга турк актёрларига тўланганидек гонорар берилмаса ҳам, ҳозирги олаётган пулидан 5-10 баробар кўпроқ тўланса, жонини бериб ишлашга тайёр.
Хайриятки, гонорарни ихтиёрий тартибда белгилаш бўйича ҳужжат чиқди, аммо ҳали амалга татбиқ этилгани йўқ. Ҳозир ҳам амалдаги ҳужжатлар бўйича бош рол ижрочисининг кунлик иштирокига 200 000 (икки юз минг) сўм тўланади. Бу пулни олган актёр қандай қилиб ролга жонини бериб ўйнаши мумкин?Ўтган йили текширув келиб, киносметада сарфланган пулларни текширди. «Ака, манави актёрга 135 000 сўм беришингиз керак, нега кўп бердингиз?» дея эътироз билдирди. Бу пулни Ўзбекистон халқ артисти Хайрулла Саъдиевга қайси юз билан тўлайман, дедим. У актёр-ку, пулга талашиб тортишмайди, аммо бошқаларга шу пулни берсангиз, ранжиши аниқ. «Мана бунча пулни берсанг бер, бўлмаса бу пулинг тупроққа қорилиб, ўйнашимга арзимайди», дейишади.
«Жалолиддин Мангуберди» сериали юртимизда суратга олинганида, пул ўзимизда қоларди. Ўзбек актёрлари эса жонини бериб суратга тушарди.
Ҳа, яна бир гап, гонорар тизими ҳақида жуда кўп гапирганман. Бу соҳани ислоҳ қилиш керак. Чунки соҳамизда актёрга гонорар беришни истамайдиган, фильмини «конфет» ва «шоколад»лар билан тўлдирадиганлар ҳам жуда кўп. Ҳатто машҳур режиссёрларнинг шундай қилмиши учун кишандан ҳам олиб қолган вазиятларим бўлган.
Ҳилол Насимов, режиссёр
Мавзуга доир:
Изоҳ (0)