Namoyishidan 20 yil o‘tib ham tomoshabinlarning sevimli multfilmi bo‘lib qolayotgan “Muzlik davri” kartinasi haqida qiziqarli ma’lumotlar

Sevimli multfilmlarimizga ko‘p yillar bo‘lganini tasavvur qilish qiyin. Masalan, “Shrek” 20 yoshdan oshgan. “Muzlik davri” esa 2022-yilda o‘zining 20 yilligini nishonladi (jahon premyerasi 15-martda bo‘lib o‘tgan). Lekin hammamiz uni haligacha zavq bilan tomosha qilamiz.

• Yalqov Sidga ovoz bergan aktyor Jon Leguizamo uzoq vaqt davomida qahramoniga mos ovoz topolmaydi. Hujjatli filmlardan yalqovlar ovqatni og‘izlarida saqlashini bilguncha u o‘nlab variantlarni sinab ko‘radi. Keyin aktyor og‘zini shokolad, yeryong‘oq moyi bilan to‘ldiradi — Sidning ovozi shu tarzda yaratiladi.
• Leonardo Di Kaprio Sidga ovoz berishi mumkin edi. Qiziq, u ham og‘zini yeryong‘oq moyiga to‘ldirib olgan bo‘larmidi?

• Olmaxon Skret xayoliy jonzot bo‘lgan, ammo 2002-yilda tadqiqotchilar haqiqatan ham Skret kattaligida, ammo tishlari juda uzun bo‘lgan sutemizuvchining qoldiqlarini topishgan.
• Skretga rejissorning o‘zi ovoz bergan. Dastlab olmaxon ishtirokida atigi 1 ta sahna rejalashtirilgan edi, ammo tomoshabinlarga bu qahramon shunchalik yoqib qoladiki, ular olmaxonni yana ko‘rsatishda davom etishadi.
• Avvaliga xushmuomala Sid ablah va yolg‘onchi bo‘lishi taxmin qilingan edi. U Qoziqtishning bolalarini aldaydigan 2 ta sahna ham yaratiladi, lekin ular ekran yuziga chiqmaydi. O‘chirilgan sahnalarni maxsus DVD’da ko‘rish mumkin.
• Ammo Sidning chekiga tushishi kerak bo‘lgan firibgar surati franshizada namoyish etilgan. Film davomida tezkor Toni ismli qahramon paydo bo‘ladi, ijodkorlar barcha yomon fazilatlarni unga joylashadi.
• Multfilm ijodkorlari Tabiat tarixi muzeyi xodimlari bilan maslahatlashadi. Olimlar e’tiroz bildirgan yagona narsa — muzlik davrida dinozavrlarning bo‘lmagani, chunki 20 ming yil oldin ular mavjud emas edi. Biroq bu narsa filmning 3-qismini ham yaratishga to‘sqinlik qilmadi.
• Franshizaning 1-qismi kadrda odamlar bo‘lgan yagona qismdir.

• Muzlik davri 2002-yilda eng ko‘p daromad keltirgan filmlar ro‘yxatida 8-o‘rinni egallaydi. 2006-yilda chiqqan sikvel esa undan ham o‘tib ketadi: u multfilmlar orasida eng yuqori prokatni to‘pladi, filmlar orasida esa 3-o‘rinni egalladi. Uni faqat “Karib dengizi qaroqchilari” va “Da Vinchi kodi” filmlari ortda qoldira olgan.
• Aynan 1-filmning muvaffaqiyati Blue Sky’ni gullab-yashnatdi.
• Filmda go‘dak muz ichida qotib qolgan o‘zga sayyoraliklar kemasini ko‘rib, qo‘lini ko‘tarib salomlashish sahnasi bor. Bu ishora “Startrek”dagi an’anaviy Vulkan salomi hisoblanadi.

• Filmdan keyingi titrning bir joyida “Muzlik davri bolalari” qatori paydo bo‘ladi. Unda multfilm yaratish jarayonida tug‘ilgan kompaniya xodimlarining chaqaloqlari sanab o‘tilgan.
• Multfilm yaratuvchilari ko‘p detallarga sinchkovlik bilan e’tibor berishganiga qaramay, barcha hayvonlar — bosh qahramonlar turli davrlarda va turli joylarda yashagan va, albatta, birga sayohat qila olmagan.
• 1-qismda yalqov Sid muzli g‘orda ko‘rgan barcha mavjudotlar keyingi qismlar sujetiga ishora qiladi: sikvelda baliqlar, 3-qismda dinozavrlar, 4- va 5-qismda esa mos ravishda yalqovlar to‘dasi va uchar likopcha paydo bo‘ladi.

• Dastlab “Muzlik davri” komediyadan ko‘ra drama bo‘lishi kerak edi, shuningdek, animatsiyani qo‘lda chizish rejalashtirilgan. Ammo u Blue Sky Studios qo‘liga tushgandan so‘ng kompyuterlashtirilgan animatsion multfilmga aylanadi.
• Qanday qilib drama komediyaga aylandi? Gap shundaki, 20th Century Fox kinokompaniyasi negadir multfilm komediya bo‘lsagina, ekranga chiqarishga rozi bo‘lgan.
• Multfilmni yaratish jarayonida jamoa hamma narsaga mas’uliyat bilan yondashgan: ijodkorlar nafaqat olimlar bilan maslahatlashishgan, balki Skret animatsiyasini chizish uchun hayvonlarning, xususan, olmaxonlarning tabiiy harakatlarini kuzatish uchun animatorlarni hayvonot bog‘iga ham jo‘natgan.