Rejissor Zulfiqor Musoqovning “Osmondagi bolalar” filmi qahramoni Nargiz — Malika Alimova “Daryo” internet-nashri uchun eksklyuziv intervyu berdi. Suhbat davomida u hayotda film qahramonlari bilan qanday munosabatda ekanligini ochiqladi.
— “Osmondagi bolalar” filmining barcha aktyorlari bilan yaqin bo‘lib ketgandik. Zulfiqor Musoqov ham yangi film olsalar, albatta, premyeralariga bizni chaqirardi. Toshkentda bo‘lsam, albatta, men ham premyeralarda ishtirok etardim. Ammo bir-ikki yil Toshkentda yashamaganligim uchun borolmagan paytlarim ham bo‘lgan. Bir muddat onam bilan Yevropada yashaganman, undan keyin ish bo‘yicha Rossiyaga ham tez-tez borib turardim. Turmushga chiqmasimdan avval 15 dan ortiq mamlakatga sayohat qilganman. Filmda Javohir rolini ijro etgan Aziz bilan gaplashib turamiz. Qolganlarni esa ijtimoiy tarmoqlar orqali kuzatib turaman. Lola rolini ijro etgan Kristina Tairova O‘zbekisondan ko‘chib ketgan. U oilasi bilan Qozog‘istonda yashaydi. U bilan ham ba’zi paytlarda ijtimoiy tarmoqlar orqali gaplashib turamiz. Kristinani so‘nggi marta “Berlin—Oqqo‘rg‘on” filmining premyerasiga kelganida ko‘rganman. Ammo “Osmondagi bolalar” filmining barcha ijodkorlari bilan munosabatim yaxshi.
Barchamiz debyutant bo‘lsak ham, birorta sahnaning suratga olinishi qiyin kechmagan. Qaytaga, bir-birimizni avvaldan biladigandek, maza qilib ishlaganmiz. Faqatgina Hamdam roli ruhiy jihatdan juda og‘ir edi. Unga juda achinganman.Filmni suratga olish jarayonida qiziqarli voqealar juda ko‘p bo‘lgan. Masalan, Hamdamning novvoyxonada ishlaydigan sahnasi suratga olinayotganda, nonlarni maza qilib yeganmiz. U yerda yopiladigan non juda mazali edi.Menimcha, film oltita bosh qahramonning hayotida faqat shirin xotiralar bilan muhrlangan bo‘lsa kerak. Kun kelib bolalarimga filmning suratga olinishi bilan bog‘liq shirin xotiralar haqida so‘zlab beraman.
Izoh (0)