O‘zbekiston milliy terma jamoasi bosh murabbiyi Srechko Katanes Navruz Cup—2022 doirasida Qirg‘izistonga qarshi o‘tkazilgan uchrashuvdan (3:1) keyin o‘z fikrlari bilan o‘rtoqlashdi.
O‘yin haqidaO‘zbekiston terma jamoasi Navruz Cup—2022 finalida 29-mart kuni Ugandaga qarshi bahs olib boradi. 3-o‘rin uchun o‘yinda esa Tojikiston va Qirg‘iziston o‘zaro to‘qnash keladi.Qisqa gapiraman. Taassurotlarim yaxshi, futbolchilarni g‘alaba bilan tabriklayman. Jamoa yaxshi va juda shiddatli o‘yin ko‘rsatdi. Biz ko‘plab vaziyatlar yaratdik, hisobda ortda qolayotganimizda ham yaxshi o‘ynadik. Afsuski, birinchi bo‘limda imkoniyatlardan foydalana olmadik. Lekin o‘yindan qoniqdim. Ikkinchi taymda faollikni oshirdik va g‘alabaga erishdik. Asosiysi, g‘alaba.
Raqibning tezkor goli rejalarga qanday ta’sir qilgani haqida
Albatta, o‘yin boshida gol o‘tkazib yuborilsa, barchada shok holati bo‘ladi. Ammo futbolda shunday bo‘lib turadi. Terma jamoa o‘yini oldidan ko‘p narsa kutmaslik kerak, doim raqibga hurmat bilan yondashish lozim, bunga Italiya qaysi jamoaga yutqazgani ham misol bo‘la oladi (Italiya JCH—2022 saralashi doirasida Shimoliy Makedoniyaga yengildi — “Daryo”). Bunday holatlar futbolda bo‘lib turadi. Futbol hozir 10 yil oldingidek emas, kichik jamoalarga qarshi 8:0, 7:0 hisoblari qayd etilmaydi. Chunki futbol judayam tez rivojlanyapti. FIFA reytingida 200-o‘rindagi jamoaga qarshi o‘ynasak ham jiddiy yondashishimiz lozim.
“Markaziy” stadioni chimining holati haqida
Maydon tashqaridan qarasa, yashil ko‘rinmoqda, ammo ikkinchi bahsda qanday bo‘lishi kerak bo‘lsa, undan yomonroq holatda. Maydonni bahona qilmaymiz. To‘pni nazorat qildik, yaxshi harakatlandik. Ammo maydon tufayli xatolar ham bo‘ldi, bu ochiq-oydin ko‘rindi.
Markaziy yarim himoyachilarning o‘yini haqida
Otabek Shukurov va Odil Hamrobekov o‘rtasida balans topish kerak. Agar to‘rt himoyachi oldidagi ikki tayanch yarim himoyachisini oldinda o‘ynatsak, o‘zimizni “o‘ldirib” qo‘yamiz. Bizda barcha statistik ma’lumotlar bor. Gol tayanch yarim himoyachilarning xatosi tufayli bo‘lmadi. Xatolarimizni bilaman, ularni shu pozitsiyadagi eng yaxshi o‘yinchilar deb hisoblayman.
O‘yindan oldin o‘rtoqlik bahslarida natija muhim emas degani va nima uchun 3-goldan keyin beshinchi himoyachini tushirgani haqida
Kecha birinchi navbatda doim natija uchun o‘ynaymiz deb aytdim. Nima uchun bunchalik katta bosim bo‘layotganini tushunmayapman, bu o‘rtoqlik o‘yini-ku, o‘yinchilarni sinab ko‘rishimiz kerak. Yutqazib qo‘yishimiz ham mumkin. Lekin bir gap aytaman, terma jamoa doim 90 daqiqa davomida qo‘llab-quvvatlanishi kerak, chunki futbolchilar buni his qilishi zarur. Ba’zi hayqiriqlardan keyin maydonda “Navbahor” o‘ynayaptimi yoki terma jamoa deb o‘ylanib qoldim. Iltimos, kim terma jamoa o‘yinlariga kelsa, terma jamoani qo‘llab-quvvatlasin.
Srechko Katanes, O‘zbekiston terma jamoasi bosh murabbiyi
Izoh (0)