O‘zbekistonlik bokschi Farrux Jo‘rayev texnik nokaut evaziga Kamshibek Kunkabayevga yutqazib qo‘ydi

Qozog‘istonning Almati shahrida professional boks oqshomi bo‘lib o‘tdi.

Unda o‘zbekistonlik Farrux Jo‘rayev (6-6-1, 2 KO) ham ishtirok etdi. Jo‘rayevga qozog‘istonlik Kamshibek Kunkabayev (5-0, 3 KO) raqiblik qildi.

10 raundga mo‘ljallangan jang 2-raundda Kunkabayevning g‘alabasi bilan yakunlandi. Kunkabayevning bir qator kuchli zarbalaridan keyin hakam jangni to‘xtatishga qaror qildi.

Shu tariqa Kunkabayev prof boksdagi beshinchi g‘alabasini qo‘lga kiritdi. Qayd etish kerak, mazkur bahsda Kamshibek JAR vakili Jonni Millerga qarshi ringga ko‘tarilishi kerak edi. Biroq afrikalik bokschi jarohat olgan va shu sababli Kamshibekka boshqa raqib topilgan.

Ma’lumot uchun, Jo‘rayev so‘nggi marotaba 2021-yilning noyabr oyida ringga ko‘tarilgan. O‘shanda u qozog‘istonlik boshqa bokschi Bekzad Nurdauletovga ochkolar evaziga yutqazib qo‘ygandi.