Mesut O‘zil murabbiy bilan kelishmovchilik sabab “Fenerbahche” tarkibidan chetlatildi. U shunday holat tufayli “Arsenal”ni tark etgandi

Yarim himoyachi Mesut O‘zil “Fenerbahche” tarkibidan chetlatildi. Bu haqida Turkiya klubi matbuot xizmati ma’lum qildi.

33 yoshli futbolchi bilan birga jamoaning yana bir vakili O‘zan Tufan ham tarkibdan chetlatilgan. “Fenerbahche” nima sababdan bunday qaror qabul qilinganini ochiqlamagan.

Football London xabariga ko‘ra, Turkiya chempionatining 30-turidan o‘rin olgan “Fenerbahche”—“Konyaspor” (2:1) o‘yinida Mesut va O‘zan bosh murabbiy vazifasini bajaruvchi Ismoil Kartal bilan dahanaki janjallashib ketgan. O‘zil o‘sha o‘yinda birinchi bo‘limdan keyin zaxiraga olingan, Tufan esa 90-daqiqada maydonga tushirilgandi. Kartalning rahbariyat bilan uchrashuvidan keyin futbolchilar noma’lum muddatga chetlatilgan.

“Kayserispor”ga qarshi o‘yin oldidan O‘zil va Tufan jamoaviy mashg‘ulotlardan chetlatilgan. Agarda “Fenerbahche”ga yangi murabbiy olib kelinmasa, Mesut yangi jamoa izlaydi.

Eslatib o‘tamiz, O‘zil “Arsenal”da Mikel Arteta va rahbariyat bilan tortishib qolgan va 2021-yilning qishida londonliklar safini tark etgandi.

Avvalroq, “Real”ga qarshi o‘yindagi mag‘lubiyatdan so‘ng “PSJ” futbolchilari Neymar va Donnarumma o‘zaro janjallashib ketgani xabar qilingandi.