Иқтисодий тадқиқотлар ва ислоҳотлар маркази Ўзбекистонда ишбилармонлик фаолиятини таҳлил қилди. Бу ҳақда марказ матбуот хизмати ‘‘Дарйў’га маълум қилди.
Мониторинг натижалари шуни кўрсатдики, жорий йилнинг 1 январидан 28 февралигача бўлган даврда республикада солиқ тушумлари ҳажми ўтган йилнинг шу даврига нисбатан 20,8 фоизга ошган.
Шу билан бирга Сирдарё (52 фоиз), Бухоро (45,2 фоиз), Наманган (40,6 фоиз), Фарғона (40,4 фоиз), Қашқадарё (39,8 фоиз) вилоятларида ва Тошкент шаҳрида (62 фоиз) солиқ тушумларининг сезиларли ўсиши қайд этилди.
Солиқ тушумларининг ўсиши иқтисодиётдаги ижобий ўзгаришлар, жаҳон олтин бозоридаги нархлар конюнктураси, солиқ маъмуриятчилиги тизимини такомиллаштириш ҳисобига таъминлангани айтилмоқда. Бундан ташқари янги маъмурий воситаларни жорий этиш, жараёнларни рақамлаштириш ва автоматлаштириш, тадбиркорлик фаолиятини қонунийлаштириш ва солиқ қонунчилиги талабларига риоя қилиш тартибини соддалаштириш ишлари ҳам амалга оширилган.
Худди шу даврда божхона тўловлари бўйича тушумлар 47,1 фоизга ошган.
Божхона тушумларининг ўсиши ташқи савдо айланмасининг ўсиши, мамлакатнинг ишлаб чиқариш қувватларини кўпайтириш, божхона маъмуриятчилиги тартиб-таомилларини соддалаштириш ҳисобига таъминлангани айтилмоқда.
Давлат божхона қўмитаси маълумотларига кўра, йил бошидан буён товарлар экспорти ҳажми ўтган йилнинг шу даврига нисбатан 15,4 фоизга ошган.
Ўзбекистон экспортининг ўсиши саноат маҳсулотлари, озиқ-овқат маҳсулотлари, кимё ва қишлоқ хўжалиги маҳсулотлари экспортининг ўсиш суръатлари билан изоҳланмоқда.
Жорий йилнинг 1 январидан 28 февралигача бўлган даврда тижорат банклари томонидан берилган кредитлар ҳажми ўтган йилнинг шу даврига нисбатан 3,8 фоизга ўсди.
Таҳлил қилинаётган даврда товар-хом ашё биржасида тузилган битимлар ҳажми 46,6 фоизга ўсди.
Тузилган битимлар ҳажмининг ўсиши автомобиль бензини, дизель ёқилғиси, қора металлар, пахта толаси, полиэтилен, озуқабоп буғдой, қурилиш материаллари, спиртли ичимликлар ва бошқалар каби товарлар савдосини кўпайтириш орқали таъминланмоқда.
Изоҳ (0)