Qamchiqda yuk avtomobili yo‘l chetiga chiqib ketdi, Samarqandda Nexia-2 olib qochgan mast erkak Damas bilan to‘qnashdi

O‘zbekistonda so‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.

Qamchiq dovonida yuk avtomobili yo‘l chetiga chiqib ketdi

2022-yil 24-mart kuni soat 15:30 larda Qamchiq dovonidan o‘tuvchi A-373 Toshkent–O‘sh avtomobil yo‘lining 230-kilometrida haydovchi — 1970-yilda tug‘ilgan M.T. Volvo rusumli yuk avtomobilni boshqarib ketayotib, harakat xavfsizligini ta’minlay olmay yo‘l chetiga chiqib ketgan.

Hodisa natijasida tan jarohati olgan fuqarolar yo‘q.

Mazkur YTH yuzasidan Namangan viloyati IIB YHXB xodimlari tomonidan surishtiruv harakatlari olib borilmoqda.

Samarqandda mast haydovchi avtomobil olib qochib YTHga uchradi

2022-yil 21-mart kuni soat 20:30 da Narpay tumani “Mustaqillik” mahallasida yashovchi 27 yoshli I.F. spirtli ichimlik iste’mol qilgan holatda Narpay tumani “Mustaqillik” mahallasi Voriston qishlog‘i hududidan o‘tuvchi ichki avtomobil yo‘lining o‘ng tomonida Voriston qishlog‘i 21-uyning yonidan o‘tib ketayotganida, yo‘l chetida turgan 24 yoshli Sh.O.ning boshqaruvida bo‘lgan Nexia-2 rusumli avtomashinaning eshiklari ochiqligi va kaliti o‘zida ekanidan foydalanib, ushbu mashinani noma’lum tomonga olib qochadi.

So‘ngra mashinada I.F. Samarqand—Buxoro yo‘nalishidagi M-37 avtomobil yo‘lining 109-kilometrida, qarama-qarshi yo‘nalishda boshqarib borib Damas bilan to‘qnashib, hodisa joyidan yashiringani aniqlangan.

Olib borilgan tergov-tezkor harakatlari natijasida qonunbuzar Narpay tuman IIB xodimlari tomonidan ushlanib, protsessual tartibda ushlangan.

Mazkur holat yuzasidan Narpay tuman IIB huzuridagi Tergov bo‘linmasi tomonidan I.F.ga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.

Hozirda yuqoridagi shaxs nima sababdan ushbu jinoyatga qo‘l urganligi aniqlanmoqda.

Tergov harakatlari davom etmoqda.