Қамчиқда юк автомобили йўл четига чиқиб кетди, Самарқандда Nexia-2 олиб қочган маст эркак Damas билан тўқнашди

Ўзбекистонда сўнгги кунларда содир бўлган йўл-транспорт ҳодисалари тафсилотларини тақдим этамиз.

Қамчиқ довонида юк автомобили йўл четига чиқиб кетди

2022 йил 24 март куни соат 15:30 ларда Қамчиқ довонидан ўтувчи А-373 Тошкент–Ўш автомобиль йўлининг 230-километрида ҳайдовчи — 1970 йилда туғилган М.Т. Volvo русумли юк автомобилни бошқариб кетаётиб, ҳаракат хавфсизлигини таъминлай олмай йўл четига чиқиб кетган.

Ҳодиса натижасида тан жароҳати олган фуқаролар йўқ.

Мазкур ЙТҲ юзасидан Наманган вилояти ИИБ ЙҲХБ ходимлари томонидан суриштирув ҳаракатлари олиб борилмоқда.

Самарқандда маст ҳайдовчи автомобиль олиб қочиб ЙТҲга учради

2022 йил 21 март куни соат 20:30 да Нарпай тумани «Мустақиллик» маҳалласида яшовчи 27 ёшли И.Ф. спиртли ичимлик истеъмол қилган ҳолатда Нарпай тумани «Мустақиллик» маҳалласи Вористон қишлоғи ҳудудидан ўтувчи ички автомобиль йўлининг ўнг томонида Вористон қишлоғи 21-уйнинг ёнидан ўтиб кетаётганида, йўл четида турган 24 ёшли Ш.О.нинг бошқарувида бўлган Nexia-2 русумли автомашинанинг эшиклари очиқлиги ва калити ўзида эканидан фойдаланиб, ушбу машинани номаълум томонга олиб қочади.

Сўнгра машинада И.Ф. Самарқанд—Бухоро йўналишидаги М-37 автомобиль йўлининг 109-километрида, қарама-қарши йўналишда бошқариб бориб Damas билан тўқнашиб, ҳодиса жойидан яширингани аниқланган.

Олиб борилган тергов-тезкор ҳаракатлари натижасида қонунбузар Нарпай туман ИИБ ходимлари томонидан ушланиб, процессуал тартибда ушланган.

Мазкур ҳолат юзасидан Нарпай туман ИИБ ҳузуридаги Тергов бўлинмаси томонидан И.Ф.га нисбатан Жиноят кодекснинг 267-моддаси 1-қисми (транспорт воситасини олиб қочиш) билан жиноят иши қўзғатилган.

Ҳозирда юқоридаги шахс нима сабабдан ушбу жиноятга қўл урганлиги аниқланмоқда.

Тергов ҳаракатлари давом этмоқда.