Франция Аэрокосмик кучлари ядро қуролини олиб юришга қодир, янгиланган, ўрта масофага ўчувчи «ҳаво-ер» ракетасини (ASMPA) синовдан ўтказди. Бу ҳақда Франция Мудофаа вазирлиги хабар қилди.
«Франция Қуролли кучлари вазири Флоранс Парли 2022 йил 23 март куни модернизацияланган ядровий зарядсиз ASMPA синовдан муваффақиятли ўтганидан катта мамнуният изҳор этади», — дейилади хабарда.
Франциянинг Matra BAE Dynamics Alenia (МBDА) компанияси томонидан ишлаб чиқарилган ракета Dassault Rafale қирувчи самолёти томонидан учирилган. Учириш Франция жануби-ғарбида жойлашган Казо қишлоғидаги аэродромда амалга оширилган.
«Ушбу муваффақият янгиланган ASMPA ракетасининг ишлаб чиқариш босқичига ўтганидан далолат беради», — деди Мудофаа вазирлиги. Келажакда ракетани Аэрокосмик кучларнинг стратегик бўлинмалари ва Франция денгиз флоти денгиз авиацияси билан биргаликда фойдаланишга топшириш режалаштирилмоқда.
Ўрта масофага мўлжалланган «ҳаво-ер» ядровий ракетаси (ASMPA) 2009 йилда фойдаланишга топширилган, у тахминан 2035 йилда янги авлод «ҳаво-ер» (АСN4G) тизимига алмаштирилиши керак, деб ёзади Ле Фигаро.
Франция Европа Иттифоқида ядро қуролига эга ягона давлатдир. Мамлакат ушбу қуролдан ядровий сув ости кемаларида (SNLE баллистик ракеталари) ёки ASMPA билан қуролланган Rafale самолётларида ишлатиши мумкин.
Эслатиб ўтамиз, 2022 йилнинг февраль ойида Франция президенти Эммануэль Макрон 2050 йилгача мамлакатда камида олтита янги атом электр станцияси (АЭС) қуриш режасини эълон қилганди.
Изоҳ (0)