Stiven King Rossiyada o‘z kitoblarini chop etmaslikka qaror qildi. U mamlakatda asarlari eng ko‘p nashr qilinadigan yozuvchi

Amerikalik yozuvchi Stiven King Rossiyada barcha yangi shartnomalar yuzasidan hamkorlik to‘xtatilganini rasman e’lon qildi. Bu haqda Kingning asarlarini Rossiyada chop etuvchi “ACT” nashriyoti ma’lum qildi, korxonaga yozuvchining agenti axborot bergan.

“ACT” vakili Kingning rus tilida chop etilgan eng yangi kitobi “Billi Sammers” romani bo‘lishini bildirgan. Rossiya kitob do‘konlarida ushbu kitob 6-apreldan sotuvga chiqadi, romanning raqamli relizi esa 15-aprelda o‘tkazilishi rejalashtirilgan.

“Avval sotib olingan asarlarni nashr etish huquqi shartnomalarda belgilangan muddatlarda (yaqin uch-to‘rt yil davomida) “ACT”da qoladi, ammo yangi romanlar va muddati yakuniga yetgan huquqlarni uzaytirish ishlarini ma’lum vaqt davomida amalga oshirib bo‘lmaydi”, — degan nashriyot vakili.

5-mart kuni Stiven King Twitter’da Rossiya bilan kitoblar chiqarish masalasidagi shartnomalarini uzaytirmoqchi emasligini e’lon qilgandi.

Stiven King bugungi kunda Rossiyada kitoblar eng ko‘p nashr qilinadigan yozuvchi hisoblanadi. “Vedomosti”ning qayd etishicha King oxirgi uch yil ichida kitoblari Rossiyada eng ko‘p nashr qilinadigan mualliflar orasida yetakchilik qilib kelmoqda, ro‘yxat Rossiya kitob palatasi tomonidan tuzib chiqiladi.

2016-yildan buyon Rossiyada Stiven Kingning 6,7 milliondan ziyod nusxadagi kitobi sotilgan. Muallifning Rossiyada eng ko‘p sotilgan kitob “U” (“Ono”) hisoblanadi, rossiyaliklar olti yil ichida ushbu kitobning 393 ming nusxasini xarid qilgan.

Avval bir qator xorijlik ijrochilar va musiqa guruhlari Rossiyadagi konsertlarini bekor qilgan, Byork, Iggi Pop, Twenty One Pilots, The Killers shular jumlasidan.