Tatariston prezidenti Rustam Minnixanov boshchiligidagi delegatsiya Toshkentga kelgani to‘g‘risida xabar berilgandi. 23-mart kuni O‘zbekiston va Tataristonning investitsiya hamda iqtisodiy hamkorligi bo‘yicha o‘tkazilgan uchrashuvda “Tu-214” samolyotlarini ishlab chiqarishni qayta yo‘lga qo‘yish masalasi ham ko‘tarildi, deb xabar beradi Sputnik.
“Bugun ‘Tu-214’ni ishlab chiqarishni qayta tiklash bo‘yicha qaror qabul qilindi. Loyiha, albatta, oddiy emas. Bu borada O‘zbekiston tomonidan ham hamkorlikka umid qilamiz”, — deydi Tatariston prezidentining yordamchisi Ravil Zaripov.
Shuningdek, u gap samolyotning ayrim ehtiyot qismlarini birgalikda ishlab chiqarish haqida ketayotganini qo‘shimcha qilgan.
Investitsiyalar va tashqi savdo vaziri o‘rinbosari Xurram Teshaboyevning so‘zlariga ko‘ra, Toshkent mexanika zavodida ishlab chiqarilayotgan butlovchi qismlar bazasi ro‘yxatini kengaytirish bo‘yicha kelishuvlar allaqachon mavjud.
Ta’kidlanishicha, yo‘lovchilarni tashishga mo‘ljallangan o‘rta magistralli “Tu-214” samolyotlarini seriyali ishlab chiqarishni qayta yo‘lga qo‘yish rejasi G‘arb Rossiya aviatsiya sohasiga sanksiyalar joriy etganidan so‘ng paydo bo‘lgan.
Eslatib o‘tamiz, 2021-yilning aprelida O‘zbekiston va Rossiya samolyotsozlik sohasida qo‘shma loyihalarni amalga oshirish imkoniyatini muhokama qilgan edi. O‘shanda gap birinchi navbatda Chkalov nomidagi Toshkent aviatsiya ishlab chiqarish birlashmasi haqida ketgan. Bu yerda sovet davrida “Il-76” samolyotlari, 2012-yilga qadar esa “Il-114-100” samolyotlari ishlab chiqarilgan.
Ma’lumot uchun, Chkalov nomidagi Toshkent aviatsiya ishlab chiqarish birlashmasi 1941-yilda paydo bo‘lgan — urush boshlanishi bilan 1932-yilda Moskva yaqinidagi Ximki shahrida tashkil etilgan zavod Toshkentga evakuatsiya qilingan. Zavod so‘nggi samolyotlardan birini 2012-yilda ishlab chiqargan. Ayni paytda uning asosiy hududida Toshkent mexanika zavodi joylashgan.
Izoh (0)