“O‘zbekiston temir yo‘llari” sobiq “TAPOiCh”ning asosiy aksiyadoriga aylandi

Toshkent mexanika zavodi (sobiq “TAPOiCh” — Chkalov nomidagi Toshkent aviatsiya ishlab chiqarish birlashmasi)ning asosiy aksiyadori “O‘zbekiston temir yo‘llari” aksiyadorlik jamiyati bo‘ldi, deya xabar bermoqda “Review.uz” kompaniya matbuot xizmatiga tayanib.

“Toshkent mexanika zavodi” AJ “O‘zbekiston temir yo‘llari”ning hisob bo‘yicha yettinchi sho‘ba korxonasiga aylandi. Endi unga sobiq aviazavodning 81,52 foiz aksiyalari tegishli bo‘ladi.

Bungacha korxona ustav kapitali tuzilmasida aviasozlik zavodi aksiyalarining 76,6 foizi davlatga, 10 foizi mehnat kollektiviga tegishli bo‘lgan. O‘zbekiston tashqi iqtisodiy faoliyat milliy banki hamda Tashqi iqtisodiy aloqalar, investitsiyalar va savdo vazirligi 6,7 foizdan ulushga egalik qilgan.