Tosh ko‘tarish, arqon tortish, varraklar sayli — Farg‘onadagi Navro‘zdan fotoreportaj

Farg‘ona viloyatining barcha tuman va shaharlarida Navro‘zi olam — sharqona yangi yil munosabati bilan xalq sayillari, tomosha va konsertlar bo‘lib o‘tmoqda. “Daryo” fotomuxbiri Elyor Mamajonov bayram tadbirlarining e’tiborga molik lahzalarini tasvirga oldi.

Farg‘ona shahridagi Islom Karimov nomidagi teatr-konsert saroyi xiyobonida viloyatning Navro‘z tantanalari o‘tkazildi.

Xiyobon erta tongdanoq minglab farg‘onaliklar bilan gavjum bo‘ldi. Bayram ishtirokchilari karnay-surnay sadolari ostida kutib olindi.

Xalq sayillari sportchi yoshlarning ko‘rgazmali chiqishlari, dor va milliy o‘yinlar musobaqalari bilan boshlandi. Kurash, tosh ko‘tarish, arqon tortish, varraklar sayli, xalq amaliy san’ati — folklor namunalari, bir-biridan mazali milliy taomlar tanlovlari o‘tkazildi.

Sayillarda viloyatdagi qirg‘iz, tojik, rus hamda koreys milliy madaniy markazlari faollari ham o‘z odat va an’analari aks etgan chiqishlari bilan ishtirok etdi.

Bayram tadbirida viloyatdagi tuman va shaharlar tomonidan maxsus pavilyonlar tashkil etilib, o‘sha hududga xos urf-odatlar ko‘rsatib berildi, milliy taomlar va hunarmandchilik mahsulotlari ko‘rgazmalari namoyish etildi.

Xiyobon bo‘ylab o‘rnatilgan doshqozonlarda Navro‘zning shoh taomi — sumalak qaynadi, 23 ta qozonda osh damlanib, bayram ishtirokchilariga tarqatildi.

Folklor guruhlari, xalq ansambllari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar ijro etildi.

Abdulhay Karimov, Otabek Muhammadzohid, Abdujalil Qo‘qonov, Zohirshoh Jo‘rayev, Yorqinxo‘ja Umarov, Xumora Shokirova taniqli san’atkorlar ishtirokidagi konsert dasturi farg‘onaliklarga bayramona kayfiyat ulashdi.

Bayram tadbirlari doirasida xayriya aksiyalari o‘tkazilib, kam ta’minlangan, ehtiyojmand oilalar holidan xabar olindi.

Farg‘onadagi bog‘ va xiyobonlarda bayram tantanalari va xalq sayillari davom etmoqda.