Татаристон президенти Рустам Минниханов бошчилигидаги делегация Тошкентга келгани тўғрисида хабар берилганди. 23 март куни Ўзбекистон ва Татаристоннинг инвестиция ҳамда иқтисодий ҳамкорлиги бўйича ўтказилган учрашувда «Ту-214» самолётларини ишлаб чиқаришни қайта йўлга қўйиш масаласи ҳам кўтарилди, деб хабар беради Спутник.
«Бугун ‘Ту-214’ни ишлаб чиқаришни қайта тиклаш бўйича қарор қабул қилинди. Лойиҳа, албатта, оддий эмас. Бу борада Ўзбекистон томонидан ҳам ҳамкорликка умид қиламиз», — дейди Татаристон президентининг ёрдамчиси Равил Зарипов.
Шунингдек, у гап самолётнинг айрим эҳтиёт қисмларини биргаликда ишлаб чиқариш ҳақида кетаётганини қўшимча қилган.
Инвестициялар ва ташқи савдо вазири ўринбосари Хуррам Тешабоевнинг сўзларига кўра, Тошкент механика заводида ишлаб чиқарилаётган бутловчи қисмлар базаси рўйхатини кенгайтириш бўйича келишувлар аллақачон мавжуд.
Таъкидланишича, йўловчиларни ташишга мўлжалланган ўрта магистралли «Ту-214» самолётларини серияли ишлаб чиқаришни қайта йўлга қўйиш режаси Ғарб Россия авиация соҳасига санкциялар жорий этганидан сўнг пайдо бўлган.
Эслатиб ўтамиз, 2021 йилнинг апрелида Ўзбекистон ва Россия самолёцозлик соҳасида қўшма лойиҳаларни амалга ошириш имкониятини муҳокама қилган эди. Ўшанда гап биринчи навбатда Чкалов номидаги Тошкент авиация ишлаб чиқариш бирлашмаси ҳақида кетган. Бу ерда совет даврида «Ил-76» самолётлари, 2012 йилга қадар эса «Ил-114-100» самолётлари ишлаб чиқарилган.
Маълумот учун, Чкалов номидаги Тошкент авиация ишлаб чиқариш бирлашмаси 1941 йилда пайдо бўлган — уруш бошланиши билан 1932 йилда Москва яқинидаги Химки шаҳрида ташкил этилган завод Тошкентга эвакуация қилинган. Завод сўнгги самолётлардан бирини 2012 йилда ишлаб чиқарган. Айни пайтда унинг асосий ҳудудида Тошкент механика заводи жойлашган.
Изоҳ (0)