21-mart kuni Farg‘ona viloyati Qo‘qon shahar “Hazrati Abbos” masjidi imom-xatibi Saidkamolxon Mahmudov va uning 4 nafar oila a’zosi is gazidan vafot etgani to‘g‘risida xabar berilgandi. “Hududgazta’minot” ushbu xonadon gazlashtirilgani sabab voqea joyiga gaz ta’minoti tashkiloti mutaxassislari ham yetib borganini ma’lum qildi.
O‘rganish davomida avtomobil saqlash joyida ikki konturli isitish qozoni o‘rnatilgani va uning tepasida yotoqxona joylashgani ma’lum bo‘lgan. Shu bilan birga, dudbo‘ronda nosozliklar aniqlangan, xususan, uning yaxlitligi buzilgan. Bu esa is gazi to‘planishiga sabab bo‘lishi mumkin bo‘lgan.
Favqulodda vaziyatlar vazirligi xabariga ko‘ra, hozirda ekspertiza o‘tkazilib, o‘lim sabablari aniqlanmoqda. Shuningdek, tergov harakatlari ham olib borilmoqda.
“18-fevral kuni xonadondagi gaz uskunalari profilaktik ko‘rikdan o‘tkazilib, xonadonda yashovchilarga yong‘in xavfsizligi qoidalari bo‘yicha tushunchalar berilgan. Bu haqda maxsus kitobda qayd etilgani ma’lum qilindi”, — deyiladi xabarda.
Avvalroq Samarqandda to‘rt kishining is gazidan zaharlanib vafot etgani yuzasidan jinoyat ishi qo‘zg‘atilgani, Xorazmdagi choyxonada bir oilaning uch a’zosi is gazidan zaharlanib vafot etgani, Kattaqo‘rg‘onda is gazidan oilaviy zaharlanish oqibatida uch nafar bola halok bo‘lgani to‘g‘risida xabar berilgandi.
Izoh (0)