Qashqadaryo viloyatining Mirishkor tumanida sodir bo‘lgan yo‘l-transport hodisasi oqibatida to‘rt kishi halok bo‘ldi, deb xabar beradi viloyat IIB axborot xizmati.
Ma’lum qilinishicha, 19-mart kuni soat taxminan 08:00 larda Mirishkor tumani Jenov qishlog‘ida yashovchi N.D. Lacetti avtomashinasi bilan Qarshi—Beshkent—Kasbi—Koson 4R90 yo‘nalishida harakatlanib ketayotib, YTHga uchragan. U Qarshi tumani Shirkent qishlog‘i yo‘lining 20 kilometrida, shu yo‘nalishda fuqaro R.Z. boshqarib ketayotgan Nexia-3 avtomashinasini quvib o‘tmoqchi bo‘lib, mazkur avtomashinaning chap tomoniga to‘qnashgan va yo‘lning o‘ng chet pastki qismidagi daraxtlariga borib urilgan.
Oqibatda Lacetti avtomashinasida yo‘lovchi sifatida ketayotgan R.Fa., R.S., R.Fe. va E.R. tan jarohati olib, vafot etgan. Nexia-3 avtomashinasida bo‘lgan yo‘lovchi J.M va Lacetti avtomashinasi haydovchisi D.N. tan jarohatlari bilan shifoxonaga joylashtirilgan.
Mazkur holat yuzasidan Qarshi tuman IIB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Mirishkor tumani hokimligi axborot xizmati rahbari Azizbek Yazdurdiyevning “Daryo” so‘roviga asosan ma’lum qilishicha, halok bo‘lganlarning uch nafari aka-uka (31, 33 va 36 yoshda), yana biri (31 yosh) ularning qarindoshi bo‘lgan.
Tuman hokimligi tomonidan aka-ukalarning janoza marosimlari uchun 11 million so‘m, yana bir marhumning oilasiga 4 million so‘m berilgan.
Avvalroq Jizzaxda Kia K5 va Nexia to‘qnashuvi oqibatida 8 kishi vafot etgani to‘g‘risida xabar berilgandi.
Izoh (0)