Namanganda sharqona yangi yil — Navro‘z ayyomi ko‘tarinki kayfiyat bilan qarshi olindi. Izg‘irin ob-havo va vaqti-vaqti bilan tomchilab turgan yomg‘ir ham bayram kayfiyatiga xalaqit bergani yo‘q. Viloyatdagi Navro‘z tadbirlarida ishtirok etgan “Daryo” muxbiri Azizbek Abduvaliyev bunga guvoh bo‘ldi.
Viloyat markazi — Namangan shahridagi bayram tantanalari Zahiriddin Muhammad Bobur nomli bog‘ va “Afsonalar vodiysi” parkida nishonlandi.
Erta tongdan bu manzillarga viloyatning turli hududlaridan minglab namanganliklar kela boshladi.
Tadbirlar davomida milliy o‘yinlar va udumlar, sport musobaqalariga keng o‘rin berildi. Yigitlar arqon tortish, varrak uchirish, kurashda bellashgan bo‘lsa, qizlar bahor gullaridan chambarak tayyorlash, do‘ppido‘zlik, o‘sma qo‘yish va jozibali raqslarni maromiga yetkazdi.
Navro‘z ayyomini sumalak va palovsiz tasavvur etib bo‘lmaydi. Shu kuni o‘nlab doshqozonlarda sumalak qaynadi, oshpazlar esa eng mazali va bayramona bezatilgan palov tayyorlashda bir-birlarini ortda qoldirishga urindi.
Namangan viloyati hokimi Shavkat Abdurazzoqov, sektor rahbarlari sumalak va palovdan bajonidil totib ko‘rdi.
Bayramda turli millat vakillari ham faol qatnashdi. Viloyatdagi qirg‘iz, tojik, rus va koreys milliy madaniy markazlari vakillarining chiqishlari hech kimni befarq qoldirmadi.
Namangandagi bayram tadbirlarida taniqli san’atkorlar, yosh ijrochilar, folklor guruhlari, badiiy havaskorlik jamoalari, dorbozlar iste’dodlarini namoyish etdi. Xalqona kuy-qo‘shiqlar, o‘lan-laparlar baralla jarangladi.
Navro‘z ayyomida faxriylar, nogironligi bo‘lgan insonlar va ehtiyojmand oilalarni yo‘qlashga alohida e’tibor berildi. Yangi Namangan tumanidagi prezident tashrif buyurgan “Bunyodkor” mahallasida esa 10 nafar bolakayning xatna to‘yi o‘tkazildi va shahzodalardek kiyintirilib, sovg‘a-salom, to‘yonalar berildi.
Namanganda Navro‘z bayramiga bag‘ishlangan sayllar va tadbirlar davom etmoqda.
Izoh (0)