18-mart kuni baxtli mamlakatlar reytingi e’lon qilindi. Gallup tomonidan an’anaviy ravishda e’lon qilinadigan World Happiness Report—2022 reytingida O‘zbekiston 146 ta mamlakat orasida 53-o‘rinni egalladi. Bu 2021-yilgi ko‘rsatkichlardan 11 pog‘ona past.
Shuningdek, O‘zbekiston MDHga a’zo davlatlar orasida yetakchilikni boy bergan. Qozog‘iston — 40-o‘rin. Tojikiston (83-o‘rin), Rossiya (80-o‘rin), Qirg‘iziston (64-o‘rin) joy oldi. Turkmaniston esa 75-o‘rinni band etdi.
Reytingda beshinchi yil qatorasiga Finlyandiya yetakchilik qilmoqda. U eng baxtli davlat deb topilgan. Undan keyingi o‘rinlarni Daniya, Islandiya, Shveysariya, Niderlandiya, Lyuksemburg, Shvetsiya, Norvegiya, Isroil va Yangi Zelandiya egallagan.
Shuningdek, yetakchi davlatlardan Germaniya 14-o‘rinni, AQSH 16-o‘rinni, Buyuk Britaniya 17-o‘rinni, Fransiya 20-o‘rinni, Xitoy 72-o‘rinni egallagan.
Hindiston, Zambiya, Malavi, Tanzaniya, Syerra-Leone, Lesoto, Botsvana, Ruanda, Zimbabve, Livan va Afg‘oniston reytingning quyi pog‘onalaridan joy olgan.
Reytingni tuzishda aholi jon boshiga YIM darajasi, umr ko‘rish davomiyligi, bandlik kafolati va korrupsiya darajasi kabi ko‘rsatkichlar hisobga olinadi. Bundan tashqari, reytingda mamlakatda fuqarolik erkinliklari, xavfsizlik va kelajakka ishonch hissi mavjudligi, shuningdek oilalarning barqarorligi ko‘rsatkichlari ham inobatga olinadi.
World Happiness Report (Baxtiyorlik to‘g‘risidagi hisobot) BMTning barqaror rivojlanish yechimlarini izlash bo‘limi tomonidan har yili tuzib kelinadi. Ushbu hisobot va reyting 2012-yildan beri e’lon qilib boriladi.
Eslatib o‘tamiz, World Happiness Report’ning 2020-yilgi reytingida O‘zbekiston 153 ta mamlakat orasida 38-o‘rinni egallagan va Toshkent esa aholisi eng optimist shahar deb topilgan edi.
Izoh (0)