18 март куни бахтли мамлакатлар рейтинги эълон қилинди. Gallup томонидан анъанавий равишда эълон қилинадиган World Happiness Report—2022 рейтингида Ўзбекистон 146 та мамлакат орасида 53-ўринни эгаллади. Бу 2021 йилги кўрсаткичлардан 11 поғона паст.
Шунингдек, Ўзбекистон МДҲга аъзо давлатлар орасида етакчиликни бой берган. Қозоғистон — 40-ўрин. Тожикистон (83-ўрин), Россия (80-ўрин), Қирғизистон (64-ўрин) жой олди. Туркманистон эса 75-ўринни банд этди.
Рейтингда бешинчи йил қаторасига Финляндия етакчилик қилмоқда. У энг бахтли давлат деб топилган. Ундан кейинги ўринларни Дания, Исландия, Швейцария, Нидерландия, Люксембург, Швеция, Норвегия, Исроил ва Янги Зеландия эгаллаган.
Шунингдек, етакчи давлатлардан Германия 14-ўринни, АҚШ 16-ўринни, Буюк Британия 17-ўринни, Франция 20-ўринни, Хитой 72-ўринни эгаллаган.
Ҳиндистон, Замбия, Малави, Танзания, Серра-Леоне, Лесото, Ботсвана, Руанда, Зимбабве, Ливан ва Афғонистон рейтингнинг қуйи поғоналаридан жой олган.
Рейтингни тузишда аҳоли жон бошига ЯИМ даражаси, умр кўриш давомийлиги, бандлик кафолати ва коррупция даражаси каби кўрсаткичлар ҳисобга олинади. Бундан ташқари, рейтингда мамлакатда фуқаролик эркинликлари, хавфсизлик ва келажакка ишонч ҳисси мавжудлиги, шунингдек оилаларнинг барқарорлиги кўрсаткичлари ҳам инобатга олинади.
World Happiness Report (Бахтиёрлик тўғрисидаги ҳисобот) БМТнинг барқарор ривожланиш ечимларини излаш бўлими томонидан ҳар йили тузиб келинади. Ушбу ҳисобот ва рейтинг 2012 йилдан бери эълон қилиб борилади.
Эслатиб ўтамиз, World Happiness Report’нинг 2020 йилги рейтингида Ўзбекистон 153 та мамлакат орасида 38-ўринни эгаллаган ва Тошкент эса аҳолиси энг оптимист шаҳар деб топилган эди.
Изоҳ (0)