Украина президенти Владимир Зеленский ва Украина халқига тинчлик бўйича Нобель мукофотини бериш сўралмоқда. Европа сиёсатчилар бу борадаги мурожаатини Нобель қўмитасига йўллаган.
Маълум қилинишича, украиналик етакчи номзодини мукофотга европалик сиёсатчилар илгари сурган бўлиб, улар орасида Европа давлатларининг собиқ ва амалдаги вазирлар, шунингдек, депутатлар бор.
Улар ўз хатида қўмитадан Нобель мукофотига номзодларни илгари суриш муддатини 2022 йилнинг 31 мартига қадар узайтиришни сўраган. Бу аризаларни қабул қилиш деярли тўхтатилгани ва узайтириш тўғрисидаги қарорсиз янги номзодлар мукофотга даъвогарлар қаторига киритилмайди.
«Содир бўлаётган ақл бовар қилмас воқеаларни ҳисобга олган ҳолда, биз Нобель мукофоти қўмитасини тинчлик бўйича 2022 йилги Нобель мукофотига номзод кўрсатиш жараёнини қайта очиш ва кўриб чиқишга чақирамиз. Бу қоидаларнинг бузилиши эканини тушунамиз, аммо ҳозирги мисли кўрилмаган вазият уни оқлашига ишонамиз», — дейилади мурожаатда.
«Биз Украина халқининг Россия томонидан бошланган урушда кўрсатаётган жасоратига гувоҳмиз. Жасур украин эркак ва аёллари — Украина президенти Владимир Зеленскийдан тортиб, оддий фуқарогача демократия ҳамда мусатақилликни сақлаш учун курашмоқда», — дея таъкидланади хабарда.
Сиёсатчилар орасида — Эстония собиқ ташқи ишлар вазири, Европа парламенти аъзоси Урмас Паэт, Эстония собиқ бош вазири Андрус Ансип, Гаага стратегик тадқиқотлар марказининг сиёсий масалалар бўйича директори ва парламентнинг собиқ аъзоси Ген тен Бруке, Европа парламенти аъзолари Эстер де Ланж, Катрин Лангензипен, Нидерландия собиқ мудофа вазирлари Анк Бэйлэвелд ва Ёрис Воргоев, Нидерлания собиқ ташқи ишлар вазирлари Бернард Бот, Берт Коэндерс ва Максим Ферхаген, Нидерландия собиқ бош вазири Гай Верхофстадт ва бошқалар бор.
Эслатиб ўтамиз, 2021 йилги тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлганди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.
Изоҳ (0)