Tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi, deb yozadi “RBK”.

Foto: ABC News

Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.

“Ressa xonim va janob Muratov Filippin va Rossiyada so‘z erkinligi uchun mardonavor kurashlari evaziga Tinchlik bo‘yicha mukofotni qo‘lga kiritadi. Ayni vaqtda ular demokratiya va matbuot erkinligi tobora noqulay sharoitlarga to‘qnash kelayotgan dunyoda ushbu oliy maqsadni himoya qilayotgan barcha jurnalistlarning vakillari hisoblanadi”, — deyiladi Nobel mukofoti topshirilishi haqidagi press-relizda.

Rossiyaliklar orasida Muratovdan avval fizik olim Konstantin Novoselov Nobel mukofotiga sazovor bo‘lgan edi. Ayni paytda u Buyuk Britaniyada yashaydi, mukofotni esa 2010-yilda olgan. Tinchlik bo‘yicha Nobel mukofoti shu paytgacha birorta ham Rossiya fuqarosiga nasib etmagan, ammo u sobiq ittifoqning ikki fuqarosiga — olim va huquq himoyachisi Andrey Saxarovga hamda SSSR prezidenti Mixail Gorbachyovga topshirilgan.

O‘tgan yili tinchlik bo‘yicha Nobel mukofoti ochlikka qarshi kurashuvchi eng yirik gumanitar tashkilot bo‘lgan Jahon oziq-ovqat dasturiga berilgan edi.

Tinchlik mukofoti — Nobel mukofotlari orasida sovrindorlar Stokgolmda emas, Osloda e’lon qilinadigan va taqdirlanadigan yagonasi.

11-oktabr kuni iqtisodiyot bo‘yicha mukofot sovrindorlari e’lon qilinganidan keyin Nobel haftaligi yakunlanadi.

Avvalroq fiziologiya va tibbiyot, fizika, kimyo, adabiyot yo‘nalishlari bo‘yicha 2021-yilgi Nobel mukofotining sohiblari aniqlangandi.

Mukofotni topshirish marosimi 10-dekabr — Alfred Nobel vafot etgan kunda bo‘lib o‘tadi. Odatda Nobel mukofoti sovrindorlarini Shvetsiya qiroli Stokgolmda shaxsan tabriklardi (Osloda taqdirlanadigan Tinchlik mukofoti sovrindorlari bundan mustasno). Biroq koronavirus pandemiyasi tufayli 2021-yilda xuddi o‘tgan yilgi kabi tantanali marosim va ziyofat bo‘lmaydi. G‘oliblar onlayn tarzda taqdirlanadi.