Jonli efirda urushga qarshi namoyish bilan chiqqan Rossiyaning “Birinchi kanal” muharriri Marina Ovsyannikova ishdan bo‘shadi

To‘g‘ridan to‘g‘ri efirda Ukrainadagi urushni to‘xtatishni talab qilgan Rossiyaning “Birinchi kanal” xodimasi Marina Ovsyannikova ishdan bo‘shash haqida ariza yozdi. Bu haqda Ovsyannikovaning advokati Sergey Badamshin ma’lum qildi.

Advokatning so‘zlariga ko‘ra, ariza kanal tahririyati siyosatiga qo‘shilmagani sabab o‘z xohishiga ko‘ra yozilgan.

14-mart kuni “Birinchi kanal” xodimasi qo‘lida plakat ushlagan holda to‘g‘ridan to‘g‘ri efirda orqa plandan turib qisqa vaqt davomida Ukrainadagi urushni to‘xtatishni talab qilgan. Shuningdek, jurnalist ijtimoiy tarmoqlarda videomurojaat yo‘llagan va ikki birodar xalqning tichlik kelishuvi imzolashi zarurligini qayd etgandi. Kreml ushbu harakatga “bezorilik” deb ta’rif bergan.

Aksiyadan oldin Ovsyannikova videomurojaat yozib, Ukrainadagi urushga qarshiligini bildirgan. “Ukrainada hozir sodir bo‘layotgan narsalar — bu jinoyat. Va Rossiya — bosqinchi-davlat. Ushbu bosqinlarga faqat bir kishi javobgar. Bu inson — Vladimir Putin”, — degan u.

15-mart kuni Moskva Ostankino sudi Ovsyannikovani jinoyat kodeksining tegishli moddasi bo‘yicha aybli deb topgan va unga nisbatan 30 ming rubl jarima jazosini tayinlagan. Suddan keyin Ovsyannikova politsiyada uni 14 soat davomida so‘roq qilishgani, ammo yuridik yordam olish va yaqinlari, oila a’zolari bilan suhbatlashishga sharoit yaratib berishmaganini aytgan. Jurnalist ushbu harakatidan keyin uni qo‘llab-quvvatlagan hammaga minnatdorlik bildirgan.