O‘zbekistonda 2022-yil mart oyida juda yomg‘irli bo‘ldi ilgari kuzatilmagan jadal va davomiyligi uzoq muddatli yomg‘irlar yog‘di, deb xabar bermoqda “O‘zgidromet”.
Qayd etilishicha, shimoliy hududlardan tashqari, respublika hududining katta qismida yog‘ingarchilik miqdori oylik me’yordan sezilarli darajada ko‘p bo‘ladigan respublikaning tog‘li va tog‘li oldi hududlarida yog‘ingarchilik odatdagidan 2—3 marta ko‘p bo‘lgan. Toshkentda deyarli 2 oylik yog‘ingarchilik miqdori yog‘gan.
Jadal yomg‘irning davomiyligi ham anormal — 5-martdan 17-martga qadar deyarli har kuni biroz tanaffus bilan yomg‘ir yog‘gan.
Eng kuchli yomg‘ir 11—15-mart kunlari kuzatilgan. Respublika bo‘yicha ba’zi joylarda bir kecha-kunduzda yog‘gan yog‘ingarchilik miqdori ayrim kunlarda 25—40 mm, tog‘li hududlarda ba’zi joylarda 50—60 mm gacha bo‘lgan.
“Shu bilan yomg‘irlar tugamadi. 18-martga qadar O‘zbekiston hududining katta qismida yomg‘irlar tanaffus bilan yog‘adi, ba’zi joylarda kuchli bo‘ladi. 18-martda respublika bo‘yicha ba’zi joylarda yomg‘ir qorga aylanish ehtimoli bor. Respublikamizning shimolida yomg‘ir va qor ko‘rinishidagi yog‘ingarchilik ushbu kunlarda biroz bo‘ladi”, — deyiladi xabarda,
18-martdan so‘ng yog‘ingarchilik 2—4 kunga tanaffus qilishi kutilmoqda. Keyinchalik mart oyining oxirigacha bu kunlar kabi kuchli va uzoq muddatli yomg‘ir yog‘ishi kutilmayapti.
Ta’kidlanishicha, 2003, 2012 va 2021-yillarning mart oylarida ham juda yomg‘irli ob-havo kuzatilgan, ammo bu yilgi kabi jadal va davomiyligi uzoq muddatli yomg‘irlar ilgari kuzatilmagan.
O‘zbekistonda mart oyi boshlaridan buyon yomg‘irli ob-havo davom etmoqda. “O‘zgidromet” hafta oxirida havo keskin sovib, qor yog‘ishidan ogohlantirgandi. 17—24-mart kunlari kutilayotgan vaqti-vaqti bilan kuchli yog‘ingarchilik hamda havo haroratining sezilarli o‘zgarishlari sababli 7 ta viloyatda qor ko‘chish xavfi e’lon qilindi. Shuningdek, 9 ta viloyatda sel kelish xavfi mavjud.
Izoh (0)