Buxoro sog‘liqni saqlash tizimida 2 ming 651 nafar tibbiyot xodimi intizomiy javobgarlikka tortilgan — Korrupsiyaga qarshi kurashish agentligi

Korrupsiyaga qarshi kurashish agentligi Buxoro viloyati Sog‘liqni saqlash boshqarmasidagi qonun buzilish va korrupsiyaviy holatlar yuzasidan “Daryo”ga ma’lumot berdi.

Qayd etilishicha, fevral oyida tizimda kadrlar siyosatining qanchalik to‘g‘ri tashkil etilgani o‘rganilgan va ushbu yo‘nalishda bir qator muammo va kamchiliklar aniqlangan. Viloyat sog‘liqni saqlash boshqarmasi va uning tarkibidagi muassasalarda jami 40 ming 163 nafar tibbiyot xodimi faoliyat yuritadi. Shundan 2020—2021-yillarda 1 ming 984 nafar soha xodimiga nisbatan turli shakldagi qonun buzilishi va korrupsiyaviy holatlar yuzasidan xizmat tekshiruvlari o‘tkazilgan.

Shuningdek, kasbiy vazifalarini lozim darajada bajarmagan va sustkashlikka yo‘l qo‘ygan 2 ming 575 nafar xodim bilan tuzilgan mehnat shartnomalari bekor qilingan. Shu muddat oralig‘ida 2 ming 651 nafar tibbiyot xodimlari intizomiy javobgarlikka tortilgan.

Viloyatda tibbiyot muassasalari xodimlari tomonidan 2020-yilda 12 ta, 2021-yilda 16 ta holatda pora evaziga ishga qo‘yish uchun tamagirlik jinoyatlari sodir etilgan. Masalan, Shofirkon tumani tibbiyot birlashmasida kadrlar bo‘limi mansabdori 1998-yildan (23 yildan) buyon ishlab kelayotgan bo‘lib, ushbu mansabdor tomondan 2020 va 2021-yillarda birlashmada tamagirlik evaziga ishga joylashtirish bilan bog‘liq 2 ta jinoyat sodir etilgan.

Bundan tashqari, viloyat teri-tanosil kasalliklari dispanserida kadrlar bo‘limi boshlig‘i 1994-yildan (27 yildan) beri ishlab kelayotgan bo‘lib, ushbu muassasada ham tamagirlik evaziga ishga joylashtirish bilan bog‘liq 2 ta jinoyat sodir etilgan.

Kadrlar siyosatida korrupsiyaviy holatlarni keltirib chiqaruvchi omillardan yana biri aksariyat tibbiyot muassasalarida mehnat qonunchiligi talablariga zid ravishda yaqin qarindosh-urug‘larning o‘zaro bo‘ysunuv asosida xizmat qilib kelayotganligidir. Jumladan, 493 ta holatda tibbiyot muassasada o‘zaro qarindoshlar faoliyat yuritayotgan bo‘lsa, shundan 214 ta holatda muassasa rahbariyatiga bevosita bo‘ysunib yoki uning nazorati ostida xizmat qilayotgani ma’lum bo‘ldi. Misol uchun, viloyat ruhiy-asab kasalliklari dispanserida 18 nafar o‘zaro qarindoshlar birgalikda ishlab kelmoqda. Bu kabi holatlar deyarli barcha tibbiyot muassasalarida kuzatilmoqda.

Yuzaga kelayotgan korrupsion holatlar tibbiyot muassasalarida bo‘sh ish o‘rinlari (vakansiya)ni ochiqlamaslik, ular to‘g‘risidagi ma’lumotlarni o‘z vaqtida keng jamoatchilikka yetkazmaslik bilan ham bog‘liq hisoblanadi. Jumladan, 2020—2021-yillarda tizimda bo‘sh ish o‘rinlarini yashirish bilan bog‘liq 33 ta qonun buzilish holatlari aniqlangan. Birgina o‘tgan yilda tibbiyot muassasalarida ishga olish bilan bog‘liq 13 ta jinoyat sodir qilingan. Tahlil qilinganda 7 ta holatda muassasada aslida bo‘sh ish o‘rinlari mavjud bo‘lgan.