Namangan shahri tarkibida bo‘lgan Yangi Namangan tumani hokimligining ma’muriy binosi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
2021-yilning 24-aprelida Oliy Majlis Senati qarori bilan Yangi Namangan tumani tashkil etilgandi. 8 ming gektardan oshiq maydonni egallagan tuman tarkibiga Namangan shahridagi 79 ta mahalladan 24 tasi o‘tkazildi.
Tuman hokimligi uchun ma’muriy idora sifatida esa foydalanilmay turgan sobiq oziq-ovqat kasb-hunar kolleji binosi tanlandi.
Bino qariyb bir yil davomida mukammal ta’mirlanib, ko‘rkam va zamonaviy qiyofaga keltirildi.
“Bu yerda hokimlikdan tashqari yana 18 ta tashkilot jamlandi. Jumladan, soliq inspeksiyasi, davlat xizmatlari markazi, FHDY, moliya, mahalla, madaniyat, xalq ta’limi, maktabgacha ta’lim, bandlikka ko‘maklashish, pensiya bo‘limlari va xalq qabulxonasi ma’muriy bino tarkibidan joy oldi. Bu hududda istiqomat qiluvchi aholi uchun davlat idoralaridagi yumushlarini bir yerda hal etish imkoniyatini yaratadi”, — deydi tuman hokimligi axborot xizmati rahbari Abbosbek Sattarov.
Yangi Namangan tumani hokimligining ma’muriy binosi foydalanishga topshirish marosimida Namangan viloyati hokimi Shavkat Abdurazzaqov ishtirok etdi.
Izoh (0)