Qashqadaryo viloyati Shahrisabz tumanida yo‘l ustiga tushgan ulkan xarsangtosh qatnovni to‘xtatib qo‘ydi, deb xabar bermoqda Favqulodda vaziyatlar vazirligi.
Qayd etilishicha, G‘elon qishlog‘iga olib boruvchi yo‘lga 1-mart kuni katta tosh bo‘laklari tushib, yo‘lni yopib qo‘ygan. Olib borilgan o‘rganishlar jarayonida Hisorak—G‘elon avtomobil yo‘lining 15-kilometriga, taxminan, 400 metr kub hajmli tosh bo‘lagi qulashi oqibatida yo‘lning 20 metrdan ziyod qatnov qismi to‘liq yopilib qolgani aniqlangan.
Xavfsizlik talablariga qat'iy amal qilgan holda, Maxsus mexanizatsiyalashgan xizmatlar, Qashqadaryo viloyati FVB tasarrufidagi muhandislik-muhofaza otryadi hamkorligida yo‘lni to‘sib qolgan ulkan xarsang tosh tegishli choralar asosida bartaraf qilingan.
Yo‘lni tosh uyumlaridan tozalash ishlari harbiy xizmatchilar, G‘elon qishlog‘i fuqarolaridan iborat 50 nafardan ziyod faol yoshlar ishtirokida tashkil qilingan va avtomobil qatnovi to‘liq yo‘lga qo‘yilgan.
Avvalroq Qamchiq dovonida 15-mart kuni yo‘l chetiga tosh-tuproq massasi to‘kilib tushgani, Amirsoy tog‘-chang‘i kurortiga olib boruvchi avtomobil yo‘lida tuproq ko‘chishi sodir bo‘lgani xabar qilingandi. Bunga me’yoridan ko‘p yog‘ingarchilik yog‘ishi sabab bo‘lgan.
Shuningdek, 12-mart kuni Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan. Shuningdek, Taxtaqoracha dovonida 13-mart kuni kuchli yomg‘ir yog‘ishi oqibatida M-39 avtomobil yo‘lining 1138–1141-kilometrida qisman o‘pirilish yuzaga kelib, transport vositalarining harakati vaqtincha cheklangan.
Izoh (0)