Ўзбекистонда 2022 йил март ойида жуда ёмғирли бўлди илгари кузатилмаган жадал ва давомийлиги узоқ муддатли ёмғирлар ёғди, деб хабар бермоқда «Ўзгидромет».
Қайд этилишича, шимолий ҳудудлардан ташқари, республика ҳудудининг катта қисмида ёғингарчилик миқдори ойлик меъёрдан сезиларли даражада кўп бўладиган республиканинг тоғли ва тоғли олди ҳудудларида ёғингарчилик одатдагидан 2—3 марта кўп бўлган. Тошкентда деярли 2 ойлик ёғингарчилик миқдори ёғган.
Жадал ёмғирнинг давомийлиги ҳам анормал — 5 мартдан 17 мартга қадар деярли ҳар куни бироз танаффус билан ёмғир ёғган.
Энг кучли ёмғир 11—15 март кунлари кузатилган. Республика бўйича баъзи жойларда бир кеча-кундузда ёғган ёғингарчилик миқдори айрим кунларда 25—40 мм, тоғли ҳудудларда баъзи жойларда 50—60 мм гача бўлган.
«Шу билан ёмғирлар тугамади. 18 мартга қадар Ўзбекистон ҳудудининг катта қисмида ёмғирлар танаффус билан ёғади, баъзи жойларда кучли бўлади. 18 мартда республика бўйича баъзи жойларда ёмғир қорга айланиш эҳтимоли бор. Республикамизнинг шимолида ёмғир ва қор кўринишидаги ёғингарчилик ушбу кунларда бироз бўлади», — дейилади хабарда,
18 мартдан сўнг ёғингарчилик 2—4 кунга танаффус қилиши кутилмоқда. Кейинчалик март ойининг охиригача бу кунлар каби кучли ва узоқ муддатли ёмғир ёғиши кутилмаяпти.
Таъкидланишича, 2003, 2012 ва 2021 йилларнинг март ойларида ҳам жуда ёмғирли об-ҳаво кузатилган, аммо бу йилги каби жадал ва давомийлиги узоқ муддатли ёмғирлар илгари кузатилмаган.
Ўзбекистонда март ойи бошларидан буён ёмғирли об-ҳаво давом этмоқда. «Ўзгидромет» ҳафта охирида ҳаво кескин совиб, қор ёғишидан огоҳлантирганди. 17—24 март кунлари кутилаётган вақти-вақти билан кучли ёғингарчилик ҳамда ҳаво ҳароратининг сезиларли ўзгаришлари сабабли 7 та вилоятда қор кўчиш хавфи эълон қилинди. Шунингдек, 9 та вилоятда сел келиш хавфи мавжуд.
Изоҳ (0)