O‘zbekiston birja savdolarida shakar narxi bir kunda 15 foizga pasaydi

O‘zbekiston respublika tovar-xomashyo birjasida 18-mart kuni o‘tkazilgan ochiq birja savdolari natijalariga ko‘ra, shakarning barcha kategoriyasi bo‘yicha shakllangan o‘rtacha kunlik narxi avvalgi savdo kuniga nisbatan mahsulotning bir tonnasi uchun 15 foizga pasaygan. Bu haqda “O‘zRTXB” xabar qildi.

Qayd etilishicha, o‘tgan savdo kunida birja savdolariga jami 2 ming 100 tonna shakar qo‘yilgan bo‘lib, ulardan barcha hajmi sotilgan. Shakar bo‘yicha o‘tkazilgan birja savdolarida ishtirok etgan xaridorlarning soni 267 taga yetgan. Bu 17-martga nisbatan 32 foizga, 1-martga nisbatan uch marotabaga ko‘paygan.

18-mart kungi ochiq birja savdolari natijalariga ko‘ra shakarning barcha kategoriyasi bo‘yicha shakllangan o‘rtacha kunlik narxi avvalgi savdo kuniga nisbatan mahsulotning bir tonnasi uchun 11 million 921,9 ming so‘mdan 10 million 101,3 ming so‘mgacha, ya’ni 15,3 foizga pasaygan.

Shakarning xarid qilishda talab darajasidan kelib chiqqan holda, hududlar o‘rtasida mutanosib taqsimot shakllangan. Nisbatan yetakchilik qilgan hududlarga Toshkent shahri va Toshkent viloyati (30 foiz), Samarqand viloyati (12 foiz), Qashqadaryo va Xorazm viloyatlari (10 foizdan), Andijon va Buxoro viloyatlari (8 foizdan) kirgan. “Xorazm shakar” MChJ tomonidan 1 ming 200 tonna, “Angren shakar” MChJ tomonidan 900 tonna shakar sotilgan.

Qo‘shimcha qilinishicha, Monopoliyaga qarshi kurashish qo‘mitasi tomonidan shakarni birja savdolariga kunlik 2 ming tonnadan kam bo‘lmagan miqdorda barchaga teng sharoitda 1 tonnalik lotlarda qo‘yilishini hamda bir savdo sessiyasida bir xaridor maksimal 20 tonna shakar sotib olishi ko‘rsatmasi berilgan.