Ўзбекистон республика товар-хом ашё биржасида 18 март куни ўтказилган очиқ биржа савдолари натижаларига кўра, шакарнинг барча категорияси бўйича шаклланган ўртача кунлик нархи аввалги савдо кунига нисбатан маҳсулотнинг бир тоннаси учун 15 фоизга пасайган. Бу ҳақда «ЎзPTХБ» хабар қилди.
Қайд этилишича, ўтган савдо кунида биржа савдоларига жами 2 минг 100 тонна шакар қўйилган бўлиб, улардан барча ҳажми сотилган. Шакар бўйича ўтказилган биржа савдоларида иштирок этган харидорларнинг сони 267 тага етган. Бу 17 мартга нисбатан 32 фоизга, 1 мартга нисбатан уч маротабага кўпайган.
18 март кунги очиқ биржа савдолари натижаларига кўра шакарнинг барча категорияси бўйича шаклланган ўртача кунлик нархи аввалги савдо кунига нисбатан маҳсулотнинг бир тоннаси учун 11 миллион 921,9 минг сўмдан 10 миллион 101,3 минг сўмгача, яъни 15,3 фоизга пасайган.
Шакарнинг харид қилишда талаб даражасидан келиб чиққан ҳолда, ҳудудлар ўртасида мутаносиб тақсимот шаклланган. Нисбатан етакчилик қилган ҳудудларга Тошкент шаҳри ва Тошкент вилояти (30 фоиз), Самарқанд вилояти (12 фоиз), Қашқадарё ва Хоразм вилоятлари (10 фоиздан), Андижон ва Бухоро вилоятлари (8 фоиздан) кирган. «Хоразм шакар» МЧЖ томонидан 1 минг 200 тонна, «Ангрен шакар» МЧЖ томонидан 900 тонна шакар сотилган.
Қўшимча қилинишича, Монополияга қарши курашиш қўмитаси томонидан шакарни биржа савдоларига кунлик 2 минг тоннадан кам бўлмаган миқдорда барчага тенг шароитда 1 тонналик лотларда қўйилишини ҳамда бир савдо сессиясида бир харидор максимал 20 тонна шакар сотиб олиши кўрсатмаси берилган.
Мавзуга доир:
- Ун ва шакар нархлари кескин ошмайди. Россия ва Украинада экспортга қўйилган чекловлар ички бозоримизга таъсири қилмайди — Антимонополия қўмитаси
- Ўзбекистонда 2022 йилда буғдой ва шакар маҳсулотларида барқарорлик таъминланади — Қишлоқ хўжалиги вазирлиги
- Ўзбекистон Украина ва Россия шакарисиз қолади
- Гўшт, пиёз ва шакар нархи кўтарилди: Ўзбекистон бозорларидаги асосий озиқ-овқат маҳсулотларининг нархи маълум бўлди
Изоҳ (0)