Toshkent shahar Uchtepa tumanida 18-mart kuni daraxt qulab tushishi oqibatida bir nechta mashina shikastlandi. Bu haqda Favqulodda vaziyatlar vazirligi xabar qildi.
Qayd etilishicha, shu kuni soat 07:22 da tumanning Chilonzor 23-mavze 31-uy oldida daraxt avtomashinalar ustiga qulagani bo‘yicha Toshkent shahar FVBga xabar kelib tushgan. Voqea joyiga zudlik bilan 1 ta qutqaruv ekipaji yetib borgan. Daraxt qulashi oqibatida 6 ta (Kia, Gentra, Nexia-3, Damas, Cobalt, Niva) yengil avtomobil shikastlangan.
Hozirda yuzaga kelgan vaziyat oqibatlari tegishli tashkilotlar bilan hamkorlikda bartaraf etilmoqda. Hodisa oqibatida jabrlangan yoki halok bo‘lganlar yo‘q.
“Favqulodda vaziyatlar vazirligi aholidan kuchli shamol va yog‘ingarchilik vaqtida avtotransport vositalarini daraxtlar ostida qoldirmasligingizni so‘rab qoladi”, — deyiladi xabarda.
Eslatib o‘tamiz, 12-mart kuni Toshkent shahri Mirzo Ulug‘bek tumanida avtomobillar ustiga daraxt qulab tushgan. Favqulodda vaziyatlar vazirligi fuqarolardan kuchli shamol va yog‘ingarchilik vaqtida avtotransport vositalarini daraxtlar ostida qoldirmaslikni so‘ragan. Shuningdek, Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan.
Kuchli yomg‘ir yog‘ishi oqibatida Taxtaqoracha dovonining avtomobil yo‘lida qisman o‘pirilish yuzaga kelgandi. Shu sababli 13-mart kuni soat 16:00 dan dovon yo‘li avtomobillar harakati uchun yopilgan. Keyinchalik dovonda ta’mirlash ishlari olib borilib, transportlar harakati uchun ruxsat berilgan.
Bundan tashqari, Buxoro shahrida 11-mart kuni kechki payt hafta davomida muttasil yog‘gan yomg‘ir oqibatida “Talipoch qal’a darvozasi” chap tomonidagi qal’a devorining bir qismi qulab tushgan. Qal’a devori va darvozasini ta’mirlash uchun Turizm va ma’daniy meros vazirligi tomonidan 1 milliard so‘m mablag‘ ajratilgan.
Izoh (0)