Tashqi ishlar vaziri Abdulaziz Kamilov 18-mart kuni Koreya Respublikasining mamlakatdagi Favqulodda va muxtor elchisi etib tayinlangan Kim Xi Sangni qabul qildi. Bu haqda Tashqi ishlar vazirligi xabar qildi.
Qayd etilishicha, ishonch yorlig‘i nusxasini topshirish marosimidan so‘ng vazir elchini O‘zbekistonga tayinlangani munosabati bilan tabriklab, mas’uliyatli faoliyatida muvaffaqiyatlar tilagan. Suhbat chog‘ida tomonlarni qiziqtirgan sohalarda O‘zbekiston—Janubiy Koreya maxsus strategik sherikligining dolzarb masalalari muhokama qilingan.
Oliy darajadagi uchrashuvlarda erishilgan kelishuvlarni har tomonlama amalga oshirish muhimligi qayd etilgan. Diplomatik munosabatlar o‘rnatilganining 30 yilligi va O‘zbekistonda koreys diasporasi tashkil topganining 85 yilligini nishonlash bo‘yicha “O‘zaro almashinuv yili” doirasida bo‘lib o‘tadigan tadbirlar jadvali ko‘rib chiqilgan.
Shuningdek, tashqi ishlar vaziri 18-mart kuni Dominikana Respublikasining O‘zbekistondagi Favqulodda va muxtor elchisi (qarorgohi Moskva shahrida) etib tayinlangan Frank Kastellanosni uchrashib, ishonch yorliqlarini qabul qilib olgan. Vazir echini lavozimga kirishishi bilan tabriklagan va mas’uliyatli vazifasini amalga oshirishda muvaffaqiyatlar tilagan.
Suhbat chog‘ida siyosiy-diplomatik, savdo-investitsiyaviy, madaniy-gumanitar va boshqa sohalarda O‘zbekiston va Dominikana hamkorligini faollashtirish istiqbollari muhokama qilingan. Tomonlar o‘rtasida BMT va Amerika davlatlari tashkiloti doirasidagi hamkorlikni davom ettirish bo‘yicha kelishuvga erishilgan.
Izoh (0)