Rossiya hamda Ukraina delegatsiyalari jami 15 banddan iborat tinchlik kelishuvi ustida birgalikda ish olib bormoqda, deya xabar qilgan muzokaralarga aloqador uchta manbaga tayanib The Financial Times.
Nashrning yozishicha, tomonlar muzokaralarda sezilarli natijalarga erishishni boshlagan.
Taxminlarga ko‘ra, kelishuvda Ukrainaning NATO a’zoligiga kirish rejalarini bekor qilish va o‘z hududida xorij harbiy bazalari hamda qurollarini joylashtirishdan voz kechish ko‘zda tutilgan. Bundan tashqari, Ukraina boshqa mamlakatlardan xavfsizlik kafolatlarini olmoqchi, ular AQSh, Buyuk Britaniya va Turkiya bo‘lishi mumkin.
Shuningdek, ikki manba kelishuvda Ukrainada rus tili himoyasi masalasi ham aks etishi haqida gapirgan. Ukraina prezidentining ofisi maslahatchisi Mixail Podolyak FT’ga bergan intervyusida rus tili masalasi boshqa ijtimoiy muammolar kabi Ukraina manfaatidan kelib chiqqan holda hal etilishini bildirgan.
Podolyak Rossiya bilan kelishuv 24-fevralda mamlakat hududiga bostirib kirgan Moskva qo‘shinlarining Ukrainadan chiqib ketishi kafolatlanishini ta’kidlagan. Uning so‘zlariga ko‘ra, Qrim, DXR va LXR masalalari alohida muhokama qilinadi.
FT nashri maqolani e’lon qilganidan keyin Podolyak ushbu materialning Rossiya tomoni qoralamasi asosida tayyorlanganini aytgan.
“Mazkur bosqichda tasdiqlashimiz mumkin bo‘lgan yagona harakat bu — o‘t ochishni to‘xtatish, rus qo‘shinlarining mamlakatdan chiqib ketishi va bir qator davlatlar tomonidan Ukraina xavfsizligining kafolatlanishi masalalari bo‘ladi”, – degan Podolyak.
Moskva ham Kiyev ham 16-mart kuni kelishuv borasida ijobiy o‘zgarishlar borligini bildirgan bo‘lsa-da, Ukraina rasmiylari Rossiya prezidenti Vladimir Putinning tinchlik bitimiga rioya qilishiga ishonmayapti va Kreml kuchni qayta taqsimlab, yana hujumga o‘tishi mumkinligidan xavotirda.
The Financial Times
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)