O‘zbekistonda fevral oyida uylar sotuvi ko‘paydi. Ko‘chmas mulk bozorida vaziyat qanday?

Iqtisodiy tadqiqotlar va islohotlar markazi O‘zbekiston ko‘chmas mulk bozoridagi hozirgi vaziyatni tahlil qildi.

Qayd etilishicha, yanvar oyidagi biroz pasayishdan so‘ng O‘zbekiston uy-joy ko‘chmas mulk bozorida faollik oshgan. Savdo hajmi 8,7 foizga o‘sgan. 

2022-yil fevral oyida O‘zbekistonda ro‘yxatga olingan uy-joy oldi-sotdi bitimlari soni 22 mingtani tashkil etdi. 

Bu joriy yilning yanvar oyiga nisbatan 24,1 foizga ko‘pdir (17,7 ming). 2021-yilning shu davriga nisbatan o‘sish 8,7 foizni (20,2 ming) va 2020-yilning fevraliga (16,9 ming) nisbatan 30 foizni tashkil etdi.

Hududlar bo‘yicha fevral oyida eng yuqori o‘sish sur’atlari Buxoro (50,8 foiz), Namangan (37 foiz), Farg‘ona (30,9 foiz) va Xorazm (29,6 foiz) viloyatlarida qayd etildi.

Ko‘chmas mulk bozorida tuzilgan bitimlar sonining kamayishi Toshkent (-13,4 foiz), Navoiy (-6,4 foiz) va Andijon (-1,9 foiz) viloyatlarida kuzatildi.

Tugallangan ko‘chmas mulk oldi-sotdi shartnomalari sonining o‘zgarishi indeksi

Mutaxassislarning fikricha, 2020-yildagi koronavirus inqirozidan so‘ng O‘zbekiston uy-joy ko‘chmas mulk bozori 2021-yilda to‘liq tiklangan.

Hukumat tomonidan amalga oshirilayotgan ipoteka islohoti, 2021-yilda ipoteka kreditlarining liberallashtirilishi va daromadlarning o‘sishining tiklanishi O‘zbekistonda uy-joy ko‘chmas mulk bozorining yanada rivojlanishiga ta’sir ko‘rsatdi.

Ikkilamchi uy-joy bozoridagi faollikning o‘zgarishi

Fevral oyida ikkilamchi bozorda o‘rtacha uy-joy narxlari o‘tgan oyga nisbatan 1,7 foizga o‘sdi.

Hududlar kesimida uy-joy narxining eng yuqori o‘sish sur’atlari Sirdaryo (10,1 foiz) va Surxondaryo (6,4 foiz) viloyatlarida, shuningdek, Qoraqalpog‘iston Respublikasida (4,5 foiz) kuzatildi. Samarqand (-2,3 foiz) Andijon (-2,1 foiz) va Namangan (-1,3 foiz) viloyatlarida uy-joy narxining pasayishi qayd etildi.

Toshkent shahrida ikkilamchi bozorda o‘rtacha uy-joy narxlari o‘tgan oyga nisbatan 1,6 foizga oshgan. Eng yuqori o‘sish Uchtepa (4,2 foiz), Yakkasaroy (3,4 foiz) va Yashnobod (2,9 foiz) tumanlarida qayd etildi.

Ikkilamchi uy-joy bozorida o‘rtacha narxlarning pasayishi poytaxtning Shayxontohur (-2,1 foiz) va Bektemir (-1,9 foiz) tumanlarida kuzatilgan.