Ўзбекистонда февраль ойида уйлар сотуви кўпайди. Кўчмас мулк бозорида вазият қандай?

Иқтисодий тадқиқотлар ва ислоҳотлар маркази Ўзбекистон кўчмас мулк бозоридаги ҳозирги вазиятни таҳлил қилди.

Қайд этилишича, январь ойидаги бироз пасайишдан сўнг Ўзбекистон уй-жой кўчмас мулк бозорида фаоллик ошган. Савдо ҳажми 8,7 фоизга ўсган. 

2022 йил февраль ойида Ўзбекистонда рўйхатга олинган уй-жой олди-сотди битимлари сони 22 мингтани ташкил этди. 

Бу жорий йилнинг январь ойига нисбатан 24,1 фоизга кўпдир (17,7 минг). 2021 йилнинг шу даврига нисбатан ўсиш 8,7 фоизни (20,2 минг) ва 2020 йилнинг февралига (16,9 минг) нисбатан 30 фоизни ташкил этди.

Ҳудудлар бўйича февраль ойида энг юқори ўсиш суръатлари Бухоро (50,8 фоиз), Наманган (37 фоиз), Фарғона (30,9 фоиз) ва Хоразм (29,6 фоиз) вилоятларида қайд этилди.

Кўчмас мулк бозорида тузилган битимлар сонининг камайиши Тошкент (-13,4 фоиз), Навоий (-6,4 фоиз) ва Андижон (-1,9 фоиз) вилоятларида кузатилди.

Тугалланган кўчмас мулк олди-сотди шартномалари сонининг ўзгариши индекси

Мутахассисларнинг фикрича, 2020 йилдаги коронавирус инқирозидан сўнг Ўзбекистон уй-жой кўчмас мулк бозори 2021 йилда тўлиқ тикланган.

Ҳукумат томонидан амалга оширилаётган ипотека ислоҳоти, 2021 йилда ипотека кредитларининг либераллаштирилиши ва даромадларнинг ўсишининг тикланиши Ўзбекистонда уй-жой кўчмас мулк бозорининг янада ривожланишига таъсир кўрсатди.

Иккиламчи уй-жой бозоридаги фаолликнинг ўзгариши

Февраль ойида иккиламчи бозорда ўртача уй-жой нархлари ўтган ойга нисбатан 1,7 фоизга ўсди.

Ҳудудлар кесимида уй-жой нархининг энг юқори ўсиш суръатлари Сирдарё (10,1 фоиз) ва Сурхондарё (6,4 фоиз) вилоятларида, шунингдек, Қорақалпоғистон Республикасида (4,5 фоиз) кузатилди. Самарқанд (-2,3 фоиз) Андижон (-2,1 фоиз) ва Наманган (-1,3 фоиз) вилоятларида уй-жой нархининг пасайиши қайд этилди.

Тошкент шаҳрида иккиламчи бозорда ўртача уй-жой нархлари ўтган ойга нисбатан 1,6 фоизга ошган. Энг юқори ўсиш Учтепа (4,2 фоиз), Яккасарой (3,4 фоиз) ва Яшнобод (2,9 фоиз) туманларида қайд этилди.

Иккиламчи уй-жой бозорида ўртача нархларнинг пасайиши пойтахтнинг Шайхонтоҳур (-2,1 фоиз) ва Бектемир (-1,9 фоиз) туманларида кузатилган.