Shavkat Mirziyoyev 16-mart kuni Davlat soliq qo‘mitasida sohani takomillashtirish bo‘yicha navbatdagi vazifalar yuzasidan yig‘ilish o‘tkazdi. Bu haqda Prezident matbuot xizmati xabar qildi.
Qayd etilishicha, so‘nggi yillarda mamlakat soliq ma’muriyatchiligi tubdan isloh qilinmoqda. 2019-yil dekabrda yangi tahrirdagi Soliq kodeksi qabul qilinib, to‘g‘ridan-to‘g‘ri qo‘llanuvchi normalar joriy etilgan. Soliqlar soni 13 tadan 9 taga kamaytirilgan. Mulk solig‘i stavkasi 5 foizdan 1,5 foizga, qo‘shilgan qiymat solig‘i 20 foizdan 15 foizga tushirilgan. Ish haqiga nisbatan soliq yuki qariyb 2 baravar kamaytirilgan. Bularning natijasida soliq tushumlari 4 baravar ko‘paygan. Qo‘shilgan qiymat solig‘i to‘lovchilar soni 6 mingdan 152 mingtaga yetgan.
“Biz inson qadrini ulug‘lashni e’lon qildik, xalqimizni rozi qilishga harakat qilayapmiz. Xalqimiz qachon rozi bo‘ladi? Soliq kam bo‘lib, daromadi oshsa”, — deydi Shavkat Mirziyoyev.
Xususan, 2026-yil borib iqtisodiyotga soliq yukini 25 foizgacha kamaytirish maqsad qilingan. Shuningdek, 2023-yildan qo‘shilgan qiymat solig‘ini 12 foizgacha tushirish, keyinchalik yer va mulk soliqlarini birlashtirish mo‘ljallangan.
Yig‘ilish avvalida mutasaddilar bajarilgan ishlar to‘g‘risida axborot bergan. Davlat rahbari soliq idoralari faoliyatini yaxshilash, buning uchun axborot texnologiyalarini keng joriy etish zarurligini ta’kidlagan.
Buning natijasida jarayonlar to‘liq avtomatlashtiriladi, “yashirin iqtisodiyot” hajmini kamaytirish uchun soliq to‘siqlari bartaraf etiladi, kadrlar salohiyati mustahkamlanadi. Davlat rahbari dunyodagi tez o‘zgaruvchan, murakkab vaziyatda soliq tushumlari barqarorligini ta’minlash, tadbirkorlarga ko‘mak berish zarurligini alohida ta’kidlagan.
“Men bu yerga soliq to‘lovchilarning vakili bo‘lib keldim. Bizga hozir tushum oshishi asosiysi emas. Birinchi navbatda, tizimni to‘g‘ri qilib, bilmaganlarga o‘rgatib, soliq yukini kamaytirib, tadbirkorlarning emin-erkin, halol ishlashini yo‘lga qo‘yishimiz kerak. Soliqchilar jazolovchi emas, ko‘makchi bo‘lishi kerak”, — degan prezident.
Soliq tizimi davlat korxonalarini transformatsiya qilishda faol ishtirok etishi, ularga tannarxni pasaytirish va moliyaviy barqarorlik bo‘yicha yo‘l-yo‘riq ko‘rsatishi kerakligi aytilgan. Soliq idoralarini korrupsiyadan xoli tizimga aylantirish bo‘yicha topshiriqlar berilgan.
Mavzuga doir:
- “Hozirgi soliqchilar ikki, uch yoki to‘rt yil avvalgi soliqchilar emas” — Shavkat Mirziyoyev
- “Yanvar oyida 25 milliarddan ortiq, fevralda 30 mlrd, mart oyining 16-sanasigacha esa 15 mlrd so‘m keshbek yig‘ildi” — Sherzod Kudbiyev
- “Endi har oyda tumanlardagi soliq sohasi vakillari OAV va blogerlar ishtirokida matbuot anjumani qilib, oqni oq, qorani qora deydi” — Shavkat Mirziyoyev
- Shavkat Mirziyoyev DSQning Ma’lumotlarni qayta ishlash markazini borib ko‘rdi
Izoh (0)