O‘zbekiston hududida Twitter va TikTok VPN ilovalarisiz ishlashni boshladi. Bu haqda ijtimoiy tarmoq foydalanuvchilari ma’lum qildi.
Holat bo‘yicha rasmiy xabarlar hozircha berilgani yo‘q. Ushbu ijtimoiy tarmoqlar yana qancha vaqt ochiqligicha qolishi ham aniq emas.
Eslatib o‘tamiz, 2021-yil iyul oyida O‘zbekistonda TikTok va Twitter’ning ochilishi sekinlashdi. 2-iyul kuni esa O‘zbekistonda ayrim ijtimoiy tarmoqlar, xususan, TikTok’dan foydalanish rasman cheklandi.
Keyinchalik “Milliy tiklanish” demokratik partiyasi Markaziy kengashi raisi o‘rinbosari Feruza Muhammadjonova TikTok ijtimoiy tarmog‘ini butunlay bloklashni taklif qildi.
Toshkent shahar hokimi “Toshkent yoshlar forumi — 2020” doirasida bo‘lib o‘tgan matbuot anjumanida “Tiktokerlarga taqiq qo‘yish emas, ularni to‘g‘ri yo‘lga yo‘naltirish bo‘yicha ish olib borishimiz kerakligi” haqida aytgan edi.
“TikTok bir platforma, u yerda turli kontent bor. Hamma o‘ziga kerakli kontent oladi. Ming afsuski, taqiq qo‘yilgan odamlar kerakmas kontentlarga kirgani ko‘rinib turibdi. Agar kerakli kontentlarga kirilsa, hech qanday platformaning zarari yo‘q, deb o‘ylayman. Mening fikrimcha, tag‘in bilmadim”, — degan edi hokim “Toshkent yoshlar forumi – 2021” doirasida bo‘lib o‘tgan matbuot anjumanida.
Bundan tashqari, 2022-yilning fevral oyida O‘zbekistonda TikTok’ni butunlay bloklash taklif qilingandi. Bunga Adliya vaziri munosabat bildirib, axborot erkin tarqatilishi tarafdori ekanini aytgan va jaholatga qarshi ma’rifat bilan kurashish kerakligini ta’kidlagan.
Izoh (0)