2021-yil davomida O‘zbekistondagi avtomobil yo‘llaridagi 7078 ta obyektda nazorat ishlari o‘tkazilgan. Mazkur obyektlardagi nazorat ishlari natijasida 11 949 ta qoida buzilish holati aniqlangan. Bu haqda AOKAda o‘tkazilgan brifingda “O‘zyo‘linspeksiya” boshqarma boshlig‘i Dilshod Oxunjonov ma’lum qildi.
Tekshirilgan 45 ta yo‘l qurilish obyektining 27 tasi me’yoriy hujjatlar talablariga javob bermasligi aniqlandi
Nazorat qilish ishlari natijasida 189 ta holat bo‘yicha 6,5 milliard so‘mlik sifatsiz bajarilgan qurilish-montaj ishlar hajmini to‘lovdan chiqarish bo‘yicha buyurtmachilarga talabnomalar kiritilgan.
Qo‘pol ravishdagi qoida buzilishlarga yo‘l qo‘ygan va inspektorlar tomonidan berilgan ko‘rsatmalarni belgilangan muddatda bartaraf etmagan mansabdor shaxslarga nisbatan Ma’muriy javobgarlik to‘g‘risidagi kodeksning tegishli moddalari asosida choralar qo‘llash bo‘yicha 254 ta ma’muriy bayonnoma rasmiylashtirilib, sud organlariga yuborilgan. Bugungi kunda sudlar tomonidan 227 tasi bo‘yicha 271,24 million so‘m undirilgan.
Shu kabi 36 ta holatda shaharsozlik sohasidagi qonun hujjatlari talablarini buzayotgan mansabdor shaxslarni javobgarlikka tortish to‘g‘risida yuqori turuvchi organlariga taqdimnoma kiritilgan. Qoida buzilishlar bartaraf etilmagan 7 ta holat bo‘yicha materiallar huquq-tartibot organlariga yuborilgan.
Hisobot davrida 45 ta yo‘l qurilish obyektlarida sifat darajasini aniqlash bo‘yicha 4464 ta sinov ishlari o‘tkazilgan. Natijada 40 ta sinov bayonnoma xulosalarida — 27 ta obyektda bajarilgan yo‘l qurilish ishlari, me’yoriy hujjatlar talabiga javob bermasligi aniqlanib, vakolatli organlarga ma’lumotnoma kiritilgan.
Izoh (0)