Шавкат Мирзиёев 16 март куни Давлат солиқ қўмитасида соҳани такомиллаштириш бўйича навбатдаги вазифалар юзасидан йиғилиш ўтказди. Бу ҳақда Президент матбуот хизмати хабар қилди.
Қайд этилишича, сўнгги йилларда мамлакат солиқ маъмуриятчилиги тубдан ислоҳ қилинмоқда. 2019 йил декабрда янги таҳрирдаги Солиқ кодекси қабул қилиниб, тўғридан-тўғри қўлланувчи нормалар жорий этилган. Солиқлар сони 13 тадан 9 тага камайтирилган. Мулк солиғи ставкаси 5 фоиздан 1,5 фоизга, қўшилган қиймат солиғи 20 фоиздан 15 фоизга туширилган. Иш ҳақига нисбатан солиқ юки қарийб 2 баравар камайтирилган. Буларнинг натижасида солиқ тушумлари 4 баравар кўпайган. Қўшилган қиймат солиғи тўловчилар сони 6 мингдан 152 мингтага етган.
«Биз инсон қадрини улуғлашни эълон қилдик, халқимизни рози қилишга ҳаракат қилаяпмиз. Халқимиз қачон рози бўлади? Солиқ кам бўлиб, даромади ошса», — дейди Шавкат Мирзиёев.
Хусусан, 2026 йил бориб иқтисодиётга солиқ юкини 25 фоизгача камайтириш мақсад қилинган. Шунингдек, 2023 йилдан қўшилган қиймат солиғини 12 фоизгача тушириш, кейинчалик ер ва мулк солиқларини бирлаштириш мўлжалланган.
Йиғилиш аввалида мутасаддилар бажарилган ишлар тўғрисида ахборот берган. Давлат раҳбари солиқ идоралари фаолиятини яхшилаш, бунинг учун ахборот технологияларини кенг жорий этиш зарурлигини таъкидлаган.
Бунинг натижасида жараёнлар тўлиқ автоматлаштирилади, «яширин иқтисодиёт» ҳажмини камайтириш учун солиқ тўсиқлари бартараф этилади, кадрлар салоҳияти мустаҳкамланади. Давлат раҳбари дунёдаги тез ўзгарувчан, мураккаб вазиятда солиқ тушумлари барқарорлигини таъминлаш, тадбиркорларга кўмак бериш зарурлигини алоҳида таъкидлаган.
«Мен бу ерга солиқ тўловчиларнинг вакили бўлиб келдим. Бизга ҳозир тушум ошиши асосийси эмас. Биринчи навбатда, тизимни тўғри қилиб, билмаганларга ўргатиб, солиқ юкини камайтириб, тадбиркорларнинг эмин-эркин, ҳалол ишлашини йўлга қўйишимиз керак. Солиқчилар жазоловчи эмас, кўмакчи бўлиши керак», — деган президент.
Солиқ тизими давлат корхоналарини трансформация қилишда фаол иштирок этиши, уларга таннархни пасайтириш ва молиявий барқарорлик бўйича йўл-йўриқ кўрсатиши кераклиги айтилган. Солиқ идораларини коррупциядан холи тизимга айлантириш бўйича топшириқлар берилган.
Мавзуга доир:
- «Ҳозирги солиқчилар икки, уч ёки тўрт йил аввалги солиқчилар эмас» — Шавкат Мирзиёев
- «Январь ойида 25 миллиарддан ортиқ, февралда 30 млрд, март ойининг 16-санасигача эса 15 млрд сўм кэшбэк йиғилди» — Шерзод Кудбиев
- «Энди ҳар ойда туманлардаги солиқ соҳаси вакиллари ОАВ ва блогерлар иштирокида матбуот анжумани қилиб, оқни оқ, қорани қора дейди» — Шавкат Мирзиёев
- Шавкат Мирзиёев ДСҚнинг Маълумотларни қайта ишлаш марказини бориб кўрди
Изоҳ (0)