16-mart kuni Turkmaniston prezidenti vazifasini bajaruvchi Gurbanguli Berdimuhamedov Vazirlar Mahkamasi va Davlat xavfsizlik kengashining prezidentlik saylovlari yakuniga bag‘ishlangan kengaytirilgan yig‘ilishini o‘tkazdi. Bu haqda “Turkmenistan segodnya” davlat axborot agentligi xabar berdi.
Turkmaniston Markaziy saylov komissiyasi raisi Gulmirat Muradovning so‘zlariga ko‘ra, kuzatuvchilar saylov jarayonlari “keng demokratik va muqobil asosda tashkil etilganini” ta’kidlagan.
Amaldor, shuningdek, bosh vazir o‘rinbosari Serdar Berdimuhamedov 72,97 foiz ovoz to‘plab, Tukrmanistonning saylangan prezidentiga aylanganini bildirgan.
Gurbanguli Berdimuhamedov saylovoldi tashviqoti jarayonida kamchiliklar, xalqaro kuzatuvchilarning fikr-mulohazalari yoki takliflari bor-yo‘qligi to‘g‘risida so‘ragan. Muradov ikkala savolga ham “yo‘q” deya javob bergan.
Prezident vazifasini bajaruvchi Markaziy saylov komissiyasi rahbariga Vazirlar Mahkamasi nomidan saylovlarga tayyorgarlik va uni o‘tkazishda ishtirok etgan barchaga minnatdorchilik bildirishni buyurgan. Bundan tashqari, saylovni o‘tkazishda kamchiliklar yoki xalqaro tajribadan ortda qolish kuzatilgan taqdirda ularni qonuniylashtirish bo‘yicha takliflar kiritish vazifasini qo‘ygan.
Turkmaniston quyi palatasi raisi Gulshat Mammedova ham saylovlarning yuqori darada o‘tkazilgani to‘g‘risida hisobot bergan. Tashqi ishlar vaziri Rashid Meredov saylovlar “ITAR-TASS”, Associated Press, Frans Press, NCA, Reuters axborot agentliklari, TRT, TRT World teleradiokompaniyalari, “Turkmenistan.ru”, “Zaman” internet nashrlari, Atavatan Türkmenistan va boshqa jurnallarda yoritilganini ma’lum qilgan.
Davlat xavfsizlik kengashi kotibi Charimirat Amanov esa ovoz berish kunlari qonun va tartib ta’minlanganini bildirgan. Hisobotlardan tashqari, so‘zga chiqqanlar Serdar Berdimuhamedovni g‘alaba bilan tabriklagan.
Shundan so‘ng, Serdar Berdimuhamedovning o‘zi so‘zga chiqib, o‘ziga ovoz bergan hamyurtlariga minnatdorchilik bildirgan.
Shuningdek, ota o‘g‘lini g‘alaba bilan tabriklab, 19-mart kuni bo‘lib o‘tadigan inauguratsiya marosimiga tayyorgarlik ko‘rish va yuqori saviyada o‘tkazish bo‘yicha Davlat komissiyasi tuzilganini ma’lum qilgan.
Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov rahbarlikni yoshlarga topshirish va faoliyatini Xalq maslahati raisi sifatida davom ettirish niyatini ma’lum qilgandi.
12-mart kuni bo‘lib o‘tgan muddatidan oldingi prezidentlik saylovlarida Gurbanguli Berdimuhamedovning o‘g‘li Serdar Berdimuhamedov g‘alaba qozondi — u 72,97 foiz ovoz to‘plagan.
Izoh (0)