Qozog‘iston prezidenti Qosim-Jo‘mart To‘qayev yanvar oyida mamlakatning qator viloyatlarida sodir bo‘lgan ommaviy tartibsizliklarga baho berdi, deb xabar beradi Tengrinews.
Parlament palatalarining qo‘shma majlisida so‘zga chiqqan davlat rahbari yanvar fojialariga oid ayrim tafsilotlarni oshkor etgan.
“Bir narsani ayta olaman: bu keng ko‘lamli, batafsil ishlab chiqilgan operatsiya bo‘lib, uning maqsadi oliy rahbariyatni almashtirish, uni xalq va xorijiy jamoatchilik oldida obro‘sizlantirish edi. Fitnachilar ushbu maqsadga erishish uchun o‘ylanmasdan, oldiga Olmaotada — eng katta shahrimizda tartibsizlikni keltirib chiqarish, odamlarga qo‘rquvni singdirish, ularni voqealar oqibati halokatliligiga ishonishga majburlash, mamlakatdagi vaziyatni beqarorlashtirish vazifasi qo‘yilgan professional tayyorlangan jangarilardan foydalandi”, — deydi To‘qayev.
16-mart kuni mahalliy vaqt bilan soat 11:00 da prezident Qosim-Jo‘mart To‘qayevning Qozog‘iston xalqiga murojaatnomasi boshlangan. U mamlakatdagi davlat telekanallari orqali to‘g‘ridan to‘g‘ri efirga uzatilmoqda.
Yanvar voqealariga izoh berar ekan davlat rahbari kulrang parda ortidagi sxemalarga o‘rganib qolgan odamlar o‘z imtiyozlarini yo‘qotishdan qo‘rqib, xalqqa qarshi chiqqanini ta’kidlagan.
Bundan tashqari, prezident hokimlarga partiyalar filiallarida lavozim egallashni taqiqlash taklifini bergan. Davlat rahbarining fikricha, bunday qarorlar ko‘p qutbli partiya tizimini shakllantiradi.
Mavzuga doir: Qozog‘istonda ommaviy tartibsizliklar bo‘yicha jinoiy ishga 11 nafar o‘zbekistonlik ham tortilgan
Mamlakatdagi keskinlik munosabati bilan To‘qayev KXShT (Kollektiv xavfsizlik shartnomasi tashkiloti)ga murojaat qilib, yordam so‘radi. Tashkilot cheklangan muddatga respublikaga tinchlikparvar kontingent yuborgandi. Shuningdek, To‘qayev tartibsizliklar sabablarini o‘rganuvchi, aybdorlarni aniqlovchi va javobgarlikka tortuvchi tergov guruhini tuzishni buyurgan. Davlat rahbarining so‘zlariga ko‘ra, tartibsizliklar ishtirokchilari xorijda malaka oshirgan.
Qozog‘iston Ichki ishlar vazirligining xabar berishicha, maxsus operatsiyalar davomida 4000 nafarga yaqin terrorchi hibsga olingan, 26 nafar “qurolli jinoyatchi” o‘ldirilgan, yana 18 nafari yarador qilingan. Qozog‘iston Bosh prokuraturasi ommaviy tartibsizliklar, shuningdek, terrorchilik aktlarini sodir etish bo‘yicha tergov doirasida jinoiy ish qo‘zg‘atdi.
Izoh (0)