16 март куни Туркманистон президенти вазифасини бажарувчи Гурбангули Бердимуҳамедов Вазирлар Маҳкамаси ва Давлат хавфсизлик кенгашининг президентлик сайловлари якунига бағишланган кенгайтирилган йиғилишини ўтказди. Бу ҳақда «Туркменистан сегодня» давлат ахборот агентлиги хабар берди.
Туркманистон Марказий сайлов комиссияси раиси Гулмират Мурадовнинг сўзларига кўра, кузатувчилар сайлов жараёнлари «кенг демократик ва муқобил асосда ташкил этилганини» таъкидлаган.
Амалдор, шунингдек, бош вазир ўринбосари Сердар Бердимуҳамедов 72,97 фоиз овоз тўплаб, Тукрманистоннинг сайланган президентига айланганини билдирган.
Гурбангули Бердимуҳамедов сайловолди ташвиқоти жараёнида камчиликлар, халқаро кузатувчиларнинг фикр-мулоҳазалари ёки таклифлари бор-йўқлиги тўғрисида сўраган. Мурадов иккала саволга ҳам «йўқ» дея жавоб берган.
Президент вазифасини бажарувчи Марказий сайлов комиссияси раҳбарига Вазирлар Маҳкамаси номидан сайловларга тайёргарлик ва уни ўтказишда иштирок этган барчага миннатдорчилик билдиришни буюрган. Бундан ташқари, сайловни ўтказишда камчиликлар ёки халқаро тажрибадан ортда қолиш кузатилган тақдирда уларни қонунийлаштириш бўйича таклифлар киритиш вазифасини қўйган.
Туркманистон қуйи палатаси раиси Гулшат Маммедова ҳам сайловларнинг юқори дарада ўтказилгани тўғрисида ҳисобот берган. Ташқи ишлар вазири Рашид Мередов сайловлар «ИТАР-ТАСС», Associated Press, Frans Press, NCA, Reuters ахборот агентликлари, TRT, TRT World телерадиокомпаниялари, «Turkmenistan.ru», «Заман» интернет нашрлари, Атаватан Тüркменистан ва бошқа журналларда ёритилганини маълум қилган.
Давлат хавфсизлик кенгаши котиби Чаримират Аманов эса овоз бериш кунлари қонун ва тартиб таъминланганини билдирган. Ҳисоботлардан ташқари, сўзга чиққанлар Сердар Бердимуҳамедовни ғалаба билан табриклаган.
Шундан сўнг, Сердар Бердимуҳамедовнинг ўзи сўзга чиқиб, ўзига овоз берган ҳамюртларига миннатдорчилик билдирган.
Шунингдек, ота ўғлини ғалаба билан табриклаб, 19 март куни бўлиб ўтадиган инаугурация маросимига тайёргарлик кўриш ва юқори савияда ўтказиш бўйича Давлат комиссияси тузилганини маълум қилган.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов раҳбарликни ёшларга топшириш ва фаолиятини Халқ маслаҳати раиси сифатида давом эттириш ниятини маълум қилганди.
12 март куни бўлиб ўтган муддатидан олдинги президентлик сайловларида Гурбангули Бердимуҳамедовнинг ўғли Сердар Бердимуҳамедов ғалаба қозонди — у 72,97 фоиз овоз тўплаган.
Изоҳ (0)